ED Raid on Sanjay Singh : 'आप'चे खासदार संजय सिंह यांच्या घरी ईडीचे छापे! शोध मोहीम सुरूच

ED Raid on AAP MP Sanjay Singh : आम आदमी पक्षाचे खासदार संजय सिंह यांच्या दिल्लीच्या घरी अंमलबजावणी संचालनालय (ईडी) टीम बुधवारी (4 ऑक्टोबर) छापेमारी केल्याची माहिती समोर आली आहे. ईडीचे पथक सध्या त्यांच्या निवासस्थानी शोध घेत आहे. याआधी मे महिन्यातही ईडीने संजय सिंह यांच्या घरावर छापे टाकण्यात आले होते. त्यावेळी त्याच्या साथीदारांच्या घरांवर आणि कार्यालयांमध्ये देखील शोधमोहीम राबवण्यात आली.

संजय सिंग यांच्याकडून सातत्याने ईडी आणि सीबीआयवर आरोप केले जातात. केंद्र सरकार केंद्रीय तपास यंत्रणांच्या माध्यमातून विरोधी पक्षांच्या नेत्यांना धमकावण्याचा प्रयत्न करत असल्याचे ते सांगत राहतात. सूत्रांकडून मिळालेल्या माहितीनुसार, वृत्तसंस्था एएनआयने म्हटले आहे की, दिल्ली मद्य धोरण प्रकरणात ही छापेमारी करण्यात आली आहे. मात्र, अद्यापपर्यंत संजय सिंह यांच्या बाजूने कोणत्याही प्रकारचे अधिकृत वक्तव्य आलेले नाही किंवा आम आदमी पक्षाने यावर काहीही माहिती दिलेली नाहीये.

माजी उपमुख्यमंत्री मनीष सिसोदिया हे सध्या दिल्ली दारू धोरण प्रकरणात तुरुंगात आहेत. आम आदमी पक्षाने यापूर्वीच कोणताही घोटाळा केला नसल्याचे सांगितले आहे. दिल्ली मद्य धोरण घोटाळ्याच्या सुरू असलेल्या तपासात आप नेत्यांना गोवण्याचा प्रयत्न केला जात असल्याचे पक्षाकडून सांगण्यात येत आहे. पक्षाचा दावा आहे की आजपर्यंत तपास यंत्रणेला कोणत्याही प्रकारचे पुरावे मिळालेले नाहीत.