औषध घेण्यासाठी गेलेल्या पिता-पुत्रांवर काळाचा घाला; ४ जणांचा मृत्यू

भरधाव कारने रस्त्यावर उभ्या असलेल्या टॅंकरला मागून जोरदार धडक दिली. या अपघातात दोघांचा घटनास्थळीच मृत्यू (died) झाला. तर दोन जणांना डॉक्टरांनी मृत घोषित केले. हा भीषण अपघात उत्तर प्रदेशातील कानपूर देहाट जिल्ह्यातील अकबरपूर पोलिस स्टेशनच्या हद्दीतील राष्ट्रीय महामार्गावर घडला. अपघातातील मृत औरैया जिल्ह्यातील विविध भागातील रहिवासी होते. ते कानपूरला औषध घेण्यासाठी जात होते. (father and son died in road accident)

प्राप्त माहितीनुसार, बुधवारी राष्ट्रीय महामार्गावर कानपूर ग्रामीण भागातील अकबरपूर पोलिस ठाण्याच्या शहजादपूर गावाजवळ औरैयाहून कानपूरच्या दिशेने येणाऱ्या कारने मागून पाण्याच्या टँकरला धडक दिली. या भीषण अपघातात अरविंद माधव (५६), चालक अझहर अली (२५), मयंक पोरवाल (२९) आणि राजू पोरवाल (५५) यांचा मृत्यू (died) झाला. मयंक आणि राजू पोरवाल हे पिता-पुत्र आहेत.

अपघातानंतर जखमींनी आरडाओरडा केल्याने रस्त्यावरून जाणाऱ्यांसह परिसरातील नागरिकांची गर्दी झाली. यानंतर अकबरपूर पोलिसांना घटनेची माहिती देण्यात आली. माहिती मिळताच अकबरपूरचे एसडीएम बागीश शुक्ला पोलिसांसह घटनास्थळी पोहोचले. नागरिकांच्या मदतीने पोलिसांनी गाडीत अडकलेल्यांना बाहेर काढले.

मात्र, तोपर्यंत दोघांचा मृत्यू झाला होता. दोन जणांना गंभीर अवस्थेत गाडीतून बाहेर काढण्यात आले. त्यांना रुग्णवाहिकेतून जिल्हा रुग्णालयात नेले असता एकाचा वाटेतच मृत्यू (road accident) झाला. तर चौथ्या जखमी तरुणाचा रुग्णालयात मृत्यू झाला. पोलिसांनी अपघातग्रस्त कार महामार्गावरून हटवून वाहतूक सुरळीत करून मृतांची ओळख पटवली. अपघातातील मृतांच्या नातेवाइकांना माहिती देऊन कारवाई करण्यात येत आहे.