दिल्लीसह 'या' सहा ते आठ शहरांमध्ये फाईव्ह जी; वाचा सविस्तर माहिती

मुंबई : मुंबई, पुणे, दिल्ली, कोलकाटा, बंगळुरू, गुरुग्राम, हैदराबाद, अहमदाबाद या शहरात प्रथम फाईव्ह जी सेवा (5G internet facility) सुरु करण्यास दूरसंचार विभागाने (telecommunication permission) संमती दिली आहे. पुढील वर्षाच्या मध्यास ही सेवा सुरु होण्याचा अंदाज आहे. ज्या शहरांमध्ये फाईव्ह जी सेवेच्या चाचण्या सुरु (5G test) आहेत तेथे ही सेवा टप्प्याटप्प्याने सुरु होईल. (Five G internet facility in various cities soon as telecommunication permission granted nss91)

भारती एअरटेल, रिलायन्स जिओ, व्होडाफोन आयडिया (व्ही) या कंपन्यांतर्फे या शहरांसह चंदीगड, जामनगर, चेन्नै, लखनौ, गांधीनगर या शहरांमध्ये या सेवेच्या चाचण्या सुरु आहेत. विभागातर्फे पुढीलवर्षात एप्रिलपर्यंत फाईव्ह जी स्पेक्ट्रम चा लिलाव केला जाईल अशी शक्यता आहे. यासंदर्भात टेलिकॉम रेग्युलेटरी अॅथॉरिटीच्या (ट्राय) शिफारशींची प्रतीक्षा विभागाला आहे. ट्राय ने यापूर्वीच यासंदर्भातील फाईव्हजी च्या किमती, लिलावातील मुद्दे इ. बाबत कंपन्यांकडून सूचना मागविल्या आहेत.

सरकारने नुकतीच मोबाईल कंपन्यांना वाढता खर्च भागविण्यासाठी 20 ते 25 टक्के दरवाढ करण्यास संमती दिली आहे. तसेच जुना कर भरण्यासाठीही वेळ दिला आहे. पुढील वर्षी या कंपन्यांना नफ्यात 40 टक्के वाढ होण्याची अपेक्षा आहे. या कारणांमुळे त्यांना फाईव्ह जी सेवा सुरु करण्यासाठी गुंतवणुक करणे सोपे होईल, असा अंदाज आहे. या कंपन्यांचा कामचलाऊ नफा सध्याच्या पाऊण लाखकोटींवरून पुढीलवर्षी एक लाखकोटींवर जाईल अशी अपेक्षा आहे.

महानगरांमध्ये फाईव्ह जी स्पेक्ट्रम मिळविण्यासाठी या कंपन्यांना अंदाजे सत्तर हजार कोटी रुपये मोजावे लागतील, असे बोलले जात आहे. तर या उद्योगावरील कर्जदेखील यावर्षीच्या मार्चअखेरीस चार लाखकोटींवर गेले आहे. दूरसंचार विभागाकडील आकडेवारीनुसार देशात मार्च 2014 मध्ये 25 कोटी इंटरनेट जोडण्या होत्या, ती संख्या यावर्षीच्या जूनमध्ये 83 कोटींवर गेली आहे. तर याच कालावधीतील ब्रॉडबँड कनेक्शनमध्ये तब्बल 12 पट वाढ (सहा कोटींवरून 79 कोटी) झाली.