Same-Sex Marriage : समलिंगी विवाहांना माझा १०० टक्के विरोध - माजी न्यायाधीश जोसेफ कुरियन

नवी दिल्ली : `` मी समलिंगी विवाहांच्या विरोधात आहे,`` असे प्रतिपादन माजी न्यायाधीश कुरियन जोसेफ यांनी एका कार्यक्रमात बोलताना व्यक्त केले आहे. ``समलिंगी संबंधांना युनियन किंवा असोसिएशन असे म्हटले जाऊ शकते. मात्र असा प्रकारच्या विवाहांच्या विरोधात मी आहे.`` असे न्या. जोसेफ यांनी म्हटले आहे.

“विवाहाचा उद्देश वेगळा असतो. विवाहाचे मूळ हे पुरुष आणि स्त्री यांच्यातील मीलन आहे. विवाहानंतर स्त्री पुरुष एकत्र येऊन मुलांना जन्म देतात. मी समलिंगी संबंधांच्या विवाहाला मान्यता देण्यास १०० टक्के विरोधात आहे. समलिंगी विवाह नैतिकतेला धरुन नाही,`` असे न्या जोसेफ यांनी म्हटले आहे. ते म्हणाले, ``समलिंगी विवाह हा मुद्दा धर्म आणि संस्कृतीशी घट्टपणे जोडला गेला आहे. या मुद्द्यावर नैतिक स्तरावर वाद-विवाद झाले पाहिजेत. मात्र आता प्रकरण सर्वोच्च न्यायालयात आहे त्यामुळे मी यावर फार भाष्य करू इच्छित नाही’’.

विनाकारण प्रसिद्धी

अनेक वर्षे तुरुंगात असलेल्या कच्च्या कैद्यांबाबतच्या सुनावणी अधिक महत्त्वाच्या आहेत. मात्र समलिंगी विवाहांसारख्या विषयांना जास्त प्रसिद्धी मिळते, अशी खंतही न्या. जोसेफ कुरियन यांनी व्यक्त केली.