उत्तर प्रदेशचे माजी मुख्यमंत्री कल्याण सिंह यांचं निधन

लखनऊ : उत्तर प्रदेशचे माजी मुख्यमंत्री कल्याण सिंह यांचं दीर्घ आजारानं शनिवारी (दि. २१) रात्री सव्वा नऊच्या सुमारास निधन झालं, ते ८९ वर्षांचे होते. लखनऊ येथील संजय गांधी पोस्टग्रॅज्युएट इन्स्टिट्युट ऑफ मेडिकल सायन्सेस येथे उपचारांदरम्यान त्यांची प्राणज्योत मालवली. २३ ऑगस्ट रोजी नरोरा येथे गंगेच्या घाटावर कल्याण सिंह यांच्या पार्थिवावर अंत्यसंस्कार होतील, अशी माहिती मुख्यमंत्री योगी आदित्यानाथ यांनी दिली. राम मंदिर आंदोलनात कल्याण सिंह इतके सक्रीय होते की, त्यांना आपली मुख्यमंत्रीपदाची खुर्ची देखील त्यागावी लागली होती.

एएनआयच्या माहितीनुसार, कल्याण सिंह यांचं सेप्सिस आणि मल्टी ऑर्गन फेल्युअरमुळं निधनं झालं. आज (दि.२१) संध्याकाळी त्यांची प्रकृती खूपच खालावल्यानं उत्तर प्रदेशचे मुख्यमंत्री योगी आदित्यनाथ यांनी रुग्णालयात जाऊन त्यांची विचारपूस केली होती. कल्याण सिंह यांची प्रकृती क्रिटिकल बनली असून त्यांना जीवरक्षक प्रणालीवर ठेवण्यात आल्याचं रुग्णालयानं त्यांच्या प्रकृतीसंबंधीचं मेडिकल बुलेटिन जाहीर करताना सांगितलं होतं.

संसर्ग आणि शुद्ध हरपल्यानं कल्याण सिंह यांना ४ जुलै रोजी आयसीयूमध्ये दाखल करण्यात आलं होतं. तत्पूर्वी त्यांच्यावर डॉ. राम मनोहर लोहिया इन्स्टिट्युट ऑफ मेडिकल सायन्सेस येथे उपचार सुरु होते. कल्याण सिंह यांनी राजस्थानचे राज्यपाल म्हणूनही काम पाहिलं होतं.

उत्तर प्रदेशात तीन दिवसांचा राज्य दुखवटा

कल्याण सिंह यांच्या निधनामुळं उत्तर प्रदेशात तीन दिवसांचा राज्य दुखवटा मुख्यमंत्री योगी आदित्यनाथ यांनी जाहीर केला आहे. २३ ऑगस्ट रोजी नरोरा येथे गंगेच्या घाटावर कल्याण सिंह यांच्या पार्थिवावर अंत्यसंस्कार होतील. २३ ऑगस्ट रोजी उत्तर प्रदेशात सार्वजनिक सुट्टी असेल, अशी माहिती योगी आदित्यनाथ यांनी दिली.

राष्ट्रपती, पंतप्रधानांसह विविध नेत्यांनी वाहिली श्रद्धांजली

कल्याण सिंह यांच्या निधनाची बातमी कळताच राष्ट्रपती रामनाथ कोविंद यांच्यासह पंतप्रधान नरेंद्र मोदी आणि विविध नेत्यांनी शोक व्यक्त केला असून त्यांना श्रद्धांजली वाहिली.

कल्याण सिंह मुत्सदी राजकारणी होते - पतंप्रधान

कल्याण सिंह भारतीय राजकारणातील दिग्गज - राजनाथ सिंह

कल्याण सिंह यांची पोकळी भरुन काढणं कठीण - अमित शहा