कुलगाममध्ये चकमकीत चार दहशतवादी ठार

श्रीनगर - जम्मू-काश्‍मीरमधील कुपवाडा जिल्ह्यात दोन वेगवेगळ्या चकमकींत चार दहशतवादी ठार झाले. रात्री उशिरापर्यंत दोन्ही ठिकाणच्या चकमकी सुरू होत्या. चकमकीत मारला गेलेला एक दहशतवादी लष्करे तैयबा या पाकिस्तानातील दहशतवादी संघटनेचा म्होरक्या होता.

दुसऱ्या दहशतवाद्याची ओळख अद्याप पटलेली नाही. शौकत अहमद शेख या दहशतवाद्याला सुरक्षा दलांनी नुकतीच अटक केली होती. त्याच्या चौकशीतून मिळालेल्या माहितीच्या आधारे सुरक्षादलांनी उत्तर काश्‍मीरमधील लोलब भागात शोधमोहीम सुरू केली होती. त्यावेळी दहशतवाद्यांनी जवानांच्या दिशेने गोळीबार सुरू केला. त्याचा जवानांनी प्रत्युत्तर दिले. त्यात एक दहशतवादी मारला गेला. त्यावेळी आणखी दोन ते तीन दहशतवादी तेथे लपून बसले होते. त्यांच्याबरोबरील चकमक दीर्घकाळ सुरू होती. नंतर त्यापैकी आणखी एक दहशतवादी मारला गेल्याचे पोलिसांनी सांगितले.

दुसऱ्या घटनेत कुलगाम जिल्ह्यातीलच दमहाल हांजीपोरा येथे चकमकीत दोन दहशतवादी मारले गेले. यापैकी एक दहशतवादी लष्करे तैयबा या दहशतवादी संघटनेशी तर दुसरा जैशे मोहंमद या दहशतवादी संघटनेशी संबंधित होता, अशी माहिती जम्मू-काश्‍मीरचे पोलिस महानिरीक्षक विजय कुमार यांनी दिली. हॅरिस शरीफ आणि झाकिर पड्डेर अशी या दहशतवाद्यांची नावे आहेत.