Arvind Kejriwal : केजरीवालांच्या अटकेवर जर्मनीचं स्टेटमेंट; भारताचा संताप, परराष्ट्र मंत्रालयाने दूताला घेतलं बोलावून

Arvind Kejriwal Arrest : दिल्लीतल्या कथित मद्य घोटाळा प्रकरणात मुख्यमंत्री अरविंद केजरीवाल यांना ईडीने गुरुवारी अटक केली आहे. या अटकेवर जर्मनीने टिपण्णी केली. त्यानंतर भारताने त्याचा कडक शब्दात विरोध केलाय.

जर्मन दूतावासाचे उपप्रमुख जॉर्ज एनजवीलर यांना शनिवारी परराष्ट्र मंत्रालयाने अधिकृतरित्या विरोध केल्यामुळे बोलावून घेतले होते. एनजवीलर यांना सकाळी राजधानी दिल्लीतल्या साऊथ ब्लॉकमधून परराष्ट्र मंत्रालयाच्या कार्यालयातून बाहेर पडताना अनेकांनी बघितलं.

परराष्ट्र मंत्रालयाने जर्मन दूतासमोर म्हटलं की, त्यांच्या देशाने केलेली टिपण्णी भारतातल्या अंतर्गत प्रकरणात हस्तक्षेप करणारी होती. देशातील न्यायिक प्रकरणात हस्तक्षेप करणं योग्य नसल्याचं भारताकडून स्पष्ट करण्यात आलेलं आहे.

भारताच्या परराष्ट्र मंत्रालयाने म्हटलं की, अशा टिपण्ण्यांकडे आम्ही आमच्या न्यायिक प्रक्रियेत हस्तक्षेप म्हमून बघतो. शिवाय आमच्या न्यायपालीकेच्या स्वतंत्रतेला कमकुवत करण्याच्या उद्देशाच्या रुपाने बघतो. भारत हा कायद्याचं राज्य असलेला मजबूत लोकशाही असलेला देश आहे.

मंत्रालयाच्या अधिकाऱ्याने पुढे म्हटलं की, ज्या पद्धतीने भारतात आणि इतर लोकशाही देशांमध्ये कायद्याची प्रक्रिया असते, तशीच प्रक्रिया या प्रकरणातही सुरु आहे. कायदा आपलं काम करत आहे.

जर्मनीच्या परराष्ट्र मंत्रालयाने म्हटलं होतं की, आम्ही प्रकरणाची माहिती घेतली आहे. भारत एक लोकशाही असलेला देश आहे. आम्हाला आशा आहे की, न्यायपालीकेचं स्वातंत्र्य आणि लोकशाही मूल्यांच्या तत्त्वांना या प्रकरणात लागू केलं जाईल. केजरीवाल यांना निष्पक्ष सुनावणीचा पूर्ण अधिकार आहे. ते विनासायास सगळ्या आयुधांचा वापर करु शकतील. दोष सिद्ध होण्यापूर्वी सर्वांना निर्दोष समजणं हे एक कायद्याचं मूळ तत्त्व आहे. या केसच्या संदर्भातही हे तत्त्व लागू झालं पाहिजे.

दरम्यान, दिल्लीचे मुख्यमंत्री अरविंद केजरीवाल यांना अंमलबजावणी संचालनालयाने (ईडी) गुरुवारी रात्री उशिरा अटक केली. केजरीवाल यांना दारू घोटाळ्याशी संबंधित मनी लाँड्रिंग प्रकरणात अटक केली आहे. दरम्यान शुक्रवारी केजरीवाल यांना कोर्टात हजर करण्यात आले. ईडीने केजरीवालांची 10 दिवसांची कोठडी मागितली होती. कोर्टाने केजरीवाल यांना 28 मार्चपर्यंत ईडी कोठडी सुनावली आहे.