Gujarat court : 'गायीच्या शेणापासून बनवलेली घरे Atomic Radiation पासून सुरक्षित'

गोहत्या बंद झाल्यास पृथ्वीवरील अनेक समस्या सुटतील. गाईच्या शेणापासून बनवलेल्या घरांवर अणुकिरणांचाही काही परिणाम होत नाही, असे मत तापी जिल्हा न्यायालयाचे न्यायाधीश समीर विनोदचंद्र व्यास यांनी व्यक्त केले आहे.

गाईचे आपल्या रोजच्या जीवनात अनेक फायदे आहेत. अनेक असाध्य रोगांवर गोमूत्र प्रभावी ठरते, असेही ते म्हणाले. 68 कोटी तीर्थक्षेत्रे आणि 33 कोटी देव-देवता गाईत वास करतात. त्यामूळेच हिंदू धर्मात गायीला महत्त्व आहे.

असे असले तरी सर्रासपणे सुरू असलेल्या गोहत्येवर न्यायालयाने चिंता व्यक्त केली होती. अहवालानूसार, नोव्हेंबरमध्ये न्यायालयाने गायींच्या रक्षणासाठी सरकारी अधिकाऱ्यांना सतर्क राहत काही गोष्टींची अंमलबजावणी करण्याचे आदेश दिले होते. पण, प्रशासनाने  यासंबंधीची कोणतीही कारवाई केली नसल्याने न्यायाधीशांनी असंतोष व्यक्त केला होता.

गाय हा केवळ प्राणी नसून माता आहे, असे मानले जाते. आणि विविध श्लोकांची उदाहरणे देत न्यायालयाने सांगितले की, गायीला दुखापत झाल्यास त्याचा तुमच्या संपत्तीवर वाईट परिणाम होतो, असेही न्यायाधीश समीर विनोदचंद्र व्यास म्हणाले.

न्यायमूर्ती म्हणाले की, आज वातावरणात झालेल्या बदलालाही गोहत्याच कारणीभूत आहेत. आपण पृथ्वीचा समतोल राखला पाहिजे. त्यासाठी गायींची हत्या थांबवली पाहिजे, तरच वाढत्या प्रदुषणाची समस्या संपेल.