मोठी बातमी! गुजरातच्या माजी मुख्यमंत्र्यांसह ८ मंत्र्यांचा निवडणूक लढविण्यास नकार

अहमदाबाद : गुजरातचे माजी मुख्यमंत्री विजय रुपाणी आणि माजी उपमुख्यमंत्री नितीन पटेल यांनी राज्यातील आगामी विधानसभा निवडणूक न लढवण्याची इच्छा व्यक्त केली आहे. उपमुख्यमंत्री नितीन पटेल यांनी प्रदेशाध्यक्षांना पत्र लिहून याबाबत माहिती दिली आहे.

आश्चर्याची बाब म्हणजे काही दिवसांपूर्वी नितीन पटेल यांनी आमदारकीची निवडणूक लढविण्यासाठी दावा केला होता. पण आता स्वत:च माघार घेतली आहे. नितीन पटेल यांना यावेळी तिकीट मिळणार नसल्याची चर्चा सुरू होती.

दरम्यान निवडणुकीत यावेळी नव्या चेहऱ्यांना आणि कार्यकर्त्यांना जबाबदारी द्यायला हवी, असं मत माजी मुख्यमंत्री विजय रुपाणी यांनी व्यक्त केले आहे. आपण दिल्लीला पत्र पाठवून निवडणूक लढवणार नसल्याचे स्पष्ट केलं आहे. शिवाय केंद्रीय निवडणूक समितीने दिलेल्या सर्व उमेदवारांना विजयी करण्याचा प्रयत्न करेल, असंही रुपाणी यांनी म्हटलं.

माजी मुख्यमंत्री विजय रुपाणी आणि माजी उपमुख्यमंत्री नितीन पटेल यांच्याव्यतिरिक्त माजी गृहराज्यमंत्री प्रदीपसिंह जडेजा, सौरभ पटेल, विभावरी बेन, कौशिक पटेल, वल्लभ काकडिया आणि योगेश पटेल यांनीही निवडणूक न लढवण्याचे स्पष्ट केले आहे. सूत्रांच्या माहितीनुसार, भूपेंद्र चुडासामा यांनीही निवडणूक न लढवण्याचे सुतोवाच केले आहे. सूत्रांच्या माहितीनुसार आनंदीबेन पटेल आणि विजय रुपाणी सरकारमधील बहुतांश मंत्र्यांना तिकीट न मिळण्याची शक्यता आहे.