Haryana Violence: हरियाणानंतर आता राजस्थानमध्ये कलम 144 लागू; दुकानांची तोडफोड

Sec 144 imposed in Rajasthan:

नवी दिल्ली- हरियाणाच्या नूह जिल्ह्यात सुरु झालेल्या हिंसाचाराचे पडसाद हळूहळू देशभरात उमटत असल्याचे चित्र आहे. बजरंग दल आणि विश्व हिंदू परिषदेच्या कार्यकर्त्यांनी दिल्ली-फरिदाबाद हायवे ब्लॉक केला. त्यानंतर दिल्लीमध्ये हाय अलर्ट जारी करण्यात आला.

दिल्लीच्या अनेक भागात मोठा पोलिस फाटा तैनात करण्यात आला आहे. त्यातच आता राजस्थानच्या अलवार आणि भरतपूर जिल्ह्यात कलम 144 लागू करण्यात आला आहे. राजस्थानच्या भिवाडी येथे तीन दुकानांवर हल्ला करण्यात आल्यानंतर निर्बंध लादण्याचा निर्णय घेण्यात आला.

हरियाणाच्या नूह जिल्ह्यात धार्मिक रॅलीवर झालेल्या दगडफेकीनंतर हिंसाचाराला सुरुवात झाली. 12 ते 15 जणांच्या जमावाने रॅलीवर दगडफेक केली, तसेच तेथे उभ्या असलेल्या वाहनांना पेटवून दिले. घाबरलेल्या जवळपास 2500 लोकांनी जवळच्या मंदिरात आश्रय घेतला. या लोकांची नंतर पाच तासांनी सुटका करण्यात आली.

सोमवारी (31 जुलै) सुरु झालेला हिंसाचार अद्याप थांबलेला नाही. या हिंसाचाराचे लोन आता ईतर राज्यातही पसरताना दिसत आहे. राजस्थान मध्ये लोकांच्या संचारावर निर्बंध लादण्यात आले आहे. चार किंवा चारपेक्षा जास्त लोकांना एकत्र जमण्यास मनाई करण्यात आली आहे.

अलवार जिल्हा प्रशासनाने 10 ऑगस्टपर्यंत 10 ठिकाणी कलम 144 लादण्याचा निर्णय घेतला आहे. भरतपूर जिल्हा प्रशासनानेही पुढील आदेशापर्यंत दोन तालुक्यात संचार बंदी केली आहे. राजस्थानच्या भिवाडी येथे तीन दुकानांची तोडफोड केल्याप्रकरणी 9 लोकांना ताब्यात घेण्यात आले. यात दोन अल्पवयीन मुलांचाही समावेश आहे. जमावाने दोन मटन शॉप आणि एक कार रिपेअरिंग सेंटरची तोडफोड केली आहे. सर्व दुकाने मुस्लीम व्यक्तींच्या मालकीचे आहेत.

दरम्यान, हरियाणाच्या नूह जिल्ह्यात सुरु झालेला हिंसाचार गुरुग्राम जिल्ह्यातही पसरला आहे. आतापर्यंत 6 लोकांचा या हिंसाचारात मृत्यू झाला आहे. याप्रकरणात आतापर्यंत जवळपास दीडशे लोकांना अटक करण्यात आली आहे. राज्यात मोठ्या प्रमाणात पोलिसफाटा तैनात करण्यात आलाय. हरियाणाचे मुख्यमंत्री मनोहरलाल खट्टर यांनी जनतेला शांततेचे आवाहन केले आहे. तसेच हिंसाचारात दोषी असणाऱ्यांना सोडले जाणार नाही, असं ते म्हणाले.