हेट स्पीच : मुस्लिम नेत्यांनाही अटक व्हावी; हिंदू सेना सुप्रीम कोर्टात

नवी दिल्ली - हरिद्वारमध्ये झालेल्या धर्मसंसद प्रकरणी कारवाईनंतर आता हिंदू सेनेनं सर्वोच्च न्यायालयात (Supreme Court) धाव घेतली आहे. त्यांनी धर्म संसदेतील हेट स्पीचसाठी कारवाईविरोधात याचिका दाखल केली आहे. धर्म संसद प्रकरणी कारवाई केल्यास मुस्लिम नेत्यांनासुद्धा हेट स्पीचसाठी अटक करण्यात यावी अशी मागणी करण्यात आली आहे. हिंदू सेनेचे अध्यक्ष विष्णू गुप्ता (Vishnu Gupta) यांच्याकडून याचिका दाखल करण्यात आली आहे.

राज्य सरकारांनी असदुद्दीन ओवैसी, तौकिर रजा, साजिद रशिदी, अमानतुल्ला खान, वारिस पठाण यांच्याविरोधात हेट स्पीच प्रकरणी एफआयर दाखल करण्याचे आदेश देण्यात यावेत अशी मागणी याचिकेत केलीय. हिंदू सेनेनं म्हटलंय की, धर्म संसद प्रकरणी याचिका दाखल केलेले पत्रकार कुर्बान अली मुस्लिम समुदायातील आहेत. त्यांनी हिंदू धर्म संसदेशी संबंधित प्रकरणात आक्षेप घेतला नाही पाहिजे. हिंदुंच्या धार्मिक नेत्यांना बदनाम करण्याचा प्रयत्न केला जात असल्याचा आरोपही हिंदू सेनेनं केला आहे.

हिंदू अध्यात्मिक गुरुंकडून धर्म संसदेचं आय़ोजन कोणत्याही इतर धर्माविरोधात असं मानलं जाऊ शकत नाही. तसंच याचा विरोधही केला जाऊ नये. धार्मिक नेत्यांची वक्तव्ये ही बिगर हिंदू समाजाच्या सदस्यांकडून हिंदूंच्या संस्कृती आणि सभ्यतेविरुद्ध करण्यात आलेल्या टीकेवरील उत्तरे होती. अशा प्रकारची उत्तरे हेट स्पीच म्हणता येणार नाहीत असंही याचिकेत म्हटलं आहे.

अधिकाऱ्यांकडून सखोल चौकशी केली जात नाही तोपर्यंत या वक्तव्यांना हेट स्पीच मानता येणार नाही. भारताचे संविधन सर्व धर्मांच्या अनुयायांना समान सुरक्षा देते. देशाच्या प्रत्येक नागरिकाला विवेक, अभ्यास आणि धर्माच्या प्रचाराचं स्वातंत्र्य असल्याचं याचिकार्त्यानं म्हटलंय.

गेल्या आठवड्यात उत्तराखंड पोलिसांनी यती नरसिंहानंद आणि जितेंद्र नारायण त्यागी यांना धर्म संसदेतील हेट स्पीच प्रकरणी अटक केली होती. पत्रकार कुर्बान अली आणि पटना हायकोर्टाचे न्यायाधीश अंजना प्रकाश यांनी दाखल केलेल्या याचिकेनंतर सर्वोच्च न्यायालायने दिल्ली पोलिस आणि उत्तराखंड सरकारला नोटीस पाठवली आहे.