अफगाणिस्तानच्या स्थितीबाबत मोदींच्या निवासस्थानी उच्चस्तरीय बैठक

नवी दिल्ली : अफगाणिस्तानात तालिबान्यांनी केलेल्या कब्ज्यानंतर तिथली परिस्थिती अत्यंत खराब झाली असून इथल्या नागरिकांनी इतर देशांमध्ये शरण घेण्यासाठी धडपड सुरु केली आहे. या सर्व परिस्थितीत अफगाणिस्तानमध्ये अनेक भारतीय नागरिकही अडकून पडले आहेत. त्याचबरोबर अफगाणिस्तानातील परिस्थितीचे भारतावरही परिणाम होण्याची शक्यता आहे. या सर्व पार्श्वभूमीवर राजधानी दिल्लीत पंतप्रधान नरेंद्र मोदी यांच्या निवासस्थानी सध्या उच्चस्तरीय बैठक सुरु आहे. या बैठकीत महत्वाच्या मुद्द्यांवर निर्णय होण्याची शक्यता आहे.

कॅबिनेटच्या सुरक्षा समितीची ही बैठक असून पंतप्रधानांचं निवासस्थान असलेल्या ७ लोक कल्याण मार्ग येथे ही बैठक सुरु आहे. या बैठकीत पंतप्रधान नरेंद्र मोदी, संरक्षण मंत्री राजनाथ सिंह, गृहमंत्री अमित शहा, अर्थमंत्री निर्मला सीतारामन आणि परराष्ट्र मंत्री एस. जयशंकर हे या बैठकीला उपस्थित आहेत.