Himachal Election : निकाल राहिला लांब कॉंग्रेसच्या 'या' नेत्या म्हणतात मीच होणार मुख्यमंत्री

Himachal Pradesh Assembly Election Results 2022 : हिमाचल प्रदेश विधानसभेच्या निकालापूर्वीच काँग्रेसच्या प्रदेशाध्यक्षा प्रतिभा वीरभद्र सिंह (Pratibha Virbhadra Singh) ह्या मुख्यमंत्रीपदाच्या शर्यतीत सामील झाल्या आहेत.

आपली भूमिका स्पष्ट करताना मुख्यमंत्री वीरभद्र सिंह यांच्या पत्नी प्रतिभा सिंह म्हणाल्या, वीरभद्र सिंह यांचं कुटुंब आणि वारसा दुर्लक्षित करता येणार नाही. राज्याच्या विकासाचा वारसा पुढं नेण्यासाठी वीरभद्र कुटुंबातील कोणीतरी राज्याच्या जनतेला हवं आहे. जर या निवडणुकीत पक्षानं विजय मिळवला तर मुख्यमंत्रीपदासाठी इच्छुक असल्याचा दावा त्यांनी केला आहे.

वीरभद्र सिंह यांचं गेल्या वर्षी निधन झालं होतं. त्यांचा मुलगा विक्रमादित्य यांनी 12 नोव्हेंबर रोजी शिमला ग्रामीणमधून निवडणूक लढवली होती. त्यांची आई आणि मंडीच्या खासदार प्रतिभा सिंह या विधानसभा निवडणुकीत उमेदवार नव्हत्या. हिमाचल प्रदेश विधानसभेचे निकाल आज जाहीर होत आहेत. मात्र, निकालापूर्वी माजी मुख्यमंत्र्यांच्या पत्नी म्हणाल्या, आम्हाला 40 च्या वर जागांची अपेक्षा आहे. त्या 42 ही असू शकतात आणि 45 च्याही पुढं जाऊ शकतात. आम्ही सरकार बनवत आहोत आणि जनतेलाही तेच हवं आहे, अशी प्रतिक्रिया त्यांनी दिली.

काँग्रेसच्या प्रदेशाध्यक्षा पुढं म्हणाल्या, वीरभद्र सिंह नसल्यामुळं पक्षाचं मोठं नुकसान झालं असलं, तरी काँग्रेसच्या प्रत्येक पोस्टरवर त्यांचा फोटो आहे, त्यामुळं ही निवडणूक आम्हीच जिंकणार आहोत. मुख्यमंत्रिपदासाठी जनता आणि बहुसंख्य आमदारांना काय हवं आहे ते पक्ष पाहील. मी दावा करत नाहीये, पण लोकांना काय हवंय हे पाहावं लागेल आणि बहुतांश आमदारांना काय हवंय याचा विचार केला जाईल. आम्ही हायकमांडलाही हस्तक्षेप करायला सांगू. मला खात्री आहे की, लोकांना काय हवंय ते बघतील. निकाल आल्यानंतर हायकमांडला अंतिम निर्णय घेण्याची परवानगी द्यावी, असंही त्यांनी यावेळी स्पष्ट केलं.