सर्व जनतेने घेतला पहिला डोस; 'या' राज्याने मिळवला पहिला मान

नवी दिल्ली : गेल्या १६ जानेवारीपासून देशात लसीकरणाच्या मोहिमेचा प्रारंभ करण्यात आला होता. त्यानंतर गेल्या ८ महिन्यांमध्ये देशात आतापर्यंत 62 कोटींहून अधिक डोस देण्यात आले आहेत, अशी माहिती केंद्रीय आरोग्य मंत्रालयाने गेल्या शुक्रवारी दिली आहे. देशात आतापर्यंत सीरम इन्स्टिट्यूटची कोविशिल्ड, भारत बायोटेकची कोव्हॅक्सिन, रशियाची स्पुटनिक व्ही, अमेरिकेची मॉडर्ना आणि जॉन्सन जॉन्सनच्या सिंगल डोस असलेल्या लसीला परवानगी दिली आहे. दरम्यान, भारतातील एका राज्याने लसीकरणासाठी पात्र असलेल्या 100 टक्के लोकसंख्येला पहिला डोस देण्याचा पहिला मान मिळवला आहे.

हिमाचल प्रदेश हे राज्य देशातील पहिलं असं राज्य ठरलं आहे, ज्याने आपल्या लसीकरणासाठी पात्र असलेल्या संपूर्ण लोकसंख्येला कोरोना प्रतिबंधक लशीचा पहिला डोस दिला आहे. याबाबतची माहिती हिमाचल प्रदेशचे आरोग्यमंत्री राजीव सैझल यांनी दिली आहे. त्यांनी म्हटलंय की, हिमाचल प्रदेशमध्ये 100 टक्के पात्र वयस्कर लोकांना लशीचा पहिला डोस देण्यात आला आहे. राज्याच्या लसीकरण कार्यक्रमातील कामगिरी अत्यंत उत्तम आहे. येत्या 30 नोव्हेंबरपर्यंत संपूर्ण वयस्कर लोकसंख्येला लशीचा दुसरा डोस देखील देऊ, असं त्यांनी म्हटलं आहे.

देशात गेल्या शुक्रवारी एका दिवसांत तब्बल एक कोटी डोस नागरिकांना देण्यात आले आहेत. याबाबतची माहिती केंद्रीय आरोग्य मंत्रालयाने दिली आहे. पंतप्रधान नरेंद्र मोदी यांनीही याबाबत ट्विट करत आनंद व्यक्त केला आहे. त्यांनी म्हटलंय की, आज लसीकरणात विक्रम नोंदवला गेला आहे! 1 कोटी ओलांडणे हा एक महत्त्वाचा पराक्रम आहे. तसेच त्यांनी लस घेतलेल्यांचे आणि लसीकरण मोहीम यशस्वी करणाऱ्यांचे अभिनंदन केलंय.