सिक्कीम - उत्तर सिक्कीमच्या मंगन जिल्ह्यात झालेल्या अतिवृष्टीमुळे काही ठिकाणी भूस्खलनाच्या घटना घडल्या आहेत. संततधार पावसामुळे भूस्खलन होऊन मोठे रस्ते, पूल आणि महामार्ग बंद झाले. त्यात सुमारे दोन हजार पर्यटक उत्तर सिक्कीममध्ये अडकले असून आपत्तीमुळे मालमत्तेचे मोठे नुकसान व जीवितहानीही झाली आहे.
गेल्या दोन दिवसांपासून सिक्कीममध्ये पावसाचा जोर वाढल्याने अनेक भागांतील रस्ते बंद झाले आहेत. राष्ट्रीय महामार्ग १० हा उत्तर सिक्कीमला पश्चिम बंगालमधील कॅलिम्पाँगशी जोडणारा आहे, तोदेखील भूस्खलनामुळे बंद झाला आहे. परिणामी सिक्कीमचा संपूर्ण उत्तर भाग मुख्य प्रवाहापासून पूर्णपणे तुटला आहे.
सातत्याने होणाऱ्या मुसळधार पावसामुळे मंगन जिल्ह्यातील झोंगू, चुंगथांग, लाचेन आणि लाचुंग या भागाशी संपर्क तुटला असून दळणवळण विस्कळीत झाले आहे. गुरुडोंगमार तलाव आणि युमथांग व्हॅली या पर्यटनस्थळांसाठी हे भाग ओळखले जातात. पर्यटकांना रस्ता पूर्ववत होईपर्यंत तेथेच थांबण्याचा सल्ला स्थानिक प्रशासनाने दिला आहे.
तिस्ता ते दार्जिलिंग, राष्ट्रीय महामार्ग १०, सिंगतम-मंगन-चुंगथांग या रस्त्यांवरून वाहतूक बंद आहे. दरम्यान संगकलांग येथे नव्याने बांधलेला पूलसुद्धा कोसळला. त्यामुळे मंगन, झोंगू आणि चुंगथांग शहरांमधील दुवा तुटला. गेल्या वर्षी तीस्ता नदीला आलेल्या पुरानंतर हा पूल बांधण्यात आला होता.
मुख्यमंत्र्यांनी घेतली बैठक
आपत्तीमुळे मालमत्तेची हानी झाली असून रस्ते खचले आहेत. या पार्श्वभूमीवर मुख्यमंत्री प्रेमसिंह तमांग यांनी मिंटोकगँग येथे बैठक घेतली. आपत्तीमुळे झालेले नुकसान, जीवितहानी, रस्त्यांची अवस्था, लोकांसाठी सुरक्षिततेचे उपाय व वस्तूंचा पुरवठा आदींवर लक्ष केंद्रित केले.
पावसाची स्थिती
२४ तासांत सिक्कीममध्ये सरासरीच्या तुलनेत ११४ टक्के अधिक पाऊस
मंगन जिल्ह्यात गेल्या २४ तासांमध्ये सरासरीपेक्षा १५२ टक्के अधिक पाऊस
१ ते १४ जूनदरम्यान ३३३ मिलिमीटर पावसाची नोंद, जी सरासरीपेक्षा ९० टक्के अधिक
पुढील चार ते पाच दिवस सिक्कीममध्ये काही ठिकाणी मुसळधार पावसाचा अंदाज
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.