रेडिमेड कपड्यांचा व्यवसाय सोडून राजकारणात, ५ वेळा अटक,  बिहारमध्ये भाजपचा सर्वात मोठा चेहरा कसे बनले सुशील मोदी?

Sushil Modi:

भाजपचे ज्येष्ठ नेते आणि बिहारचे माजी उपमुख्यमंत्री सुशील कुमार मोदी यांचे काल (सोमवार) निधन झाले. ते कर्करोगाने त्रस्त होते. त्यांच्या निधनाने राजकीय वर्तुळात शोककळा पसरली आहे. सुशील कुमार मोदी बिहारचे अर्थमंत्री देखील होते. रेडिमेड कपड्यांचा व्यवसाय सोडून राजकारणात आले होते. बिहारमध्ये सत्तेपवर येण्याचे भाजपचे स्वप्न पूर्ण करण्यात सुशील मोदी यांचा सिंहाचा वाटा होता. तसेच  बिहारमधील जेडीयू-आरजेडी महाआघाडीचे सरकार पडण्यामागे त्यांची प्रमुख भूमिका होती.

१९६२ मध्ये चीनसोबत झालेल्या युद्धादरम्यान सुशील मोदी यांनी शाळेतील मुलांना जमा केले होते. नागरिकांना, शाळेतील मुलांना त्यांनी फिटनेसचे धडे दिले. यादरम्यान त्यांनी आरएसएसमध्ये प्रवेश केला. सुशील मोदी १९७३ मध्ये पाटणा विद्यापीठ विद्यार्थी संघाचे सरचिटणीस होते.

पाटणा विश्वविद्यालय शिकताना सुशील मोदी विद्यार्थी राजकारणात सक्रिय होते. १९७४ मध्ये जयप्रकाश नारायण यांच्या आवाहनावरुन त्यांनी विद्यार्थी चळवळीत उडी घेतली. जेपी आंदोलन आणि आणीबाणीच्या काळात त्यांना ५ वेळा अटक झाली होती. सुशील मोदी यांनी राज्य संघटन सचिव, अखिल भारतीय सचिव, उत्तर प्रदेश आणि बिहारचे प्रभारी,  विद्यार्थी परिषदेचे ऑफ इंडिया सरचिटणीस ही पदे १९७७ ते १९८६ या काळात भूषवली.

सुशील कुमार मोदी यांची सक्रिय राजकारणात एंट्री झाली ती १९९० मध्ये, पाटणा मध्य विधानसभा मतदारसंघातून मोदी निवडून गेले. त्यांनतर १९९५, २००९ मध्ये देखील त्यांनी विधानसभा गाजवली. लालू प्रसाद यादव चारा घोटाळ्यात अडकले होते. याबाबत त्यांच्या विरोधात सुशील मोदी यांनीच जनहित याचिका दाखल केली होती.

पुढे २००४ मध्ये मोदी यांनी लोकसभा जिंकली. भागलपूरमधून ते ते निवडून आले होते. त्यांनतर २००५ मध्ये एनडीएला बिहारमध्ये बहुमत मिळाले. नितीशकुमार मुख्यमंत्री झाल्यानंतर सुशील मोदी यांनी उपमुख्यमंत्री करण्यात आले. अर्थमंत्रीपद देखील त्यांना देण्यात आले.   २०१० मध्ये देखील नितीश सरकारमध्ये सुशील मोदी उपमुख्यमंत्री होते.  २०११ मध्ये, सुशील मोदी यांना जीएसटीवर स्थापन करण्यात आलेल्या राज्यांच्या अर्थमंत्र्यांच्या समितीचे अध्यक्ष बनवण्यात आले.