INDIA Meeting: घटक पक्षांतील नाराजीच्या चर्चांमध्ये इंडिया आघाडीची बैठक पुढे ढकलली; नवी तारीख आली समोर

नवी दिल्ली : पाच राज्यांच्या निवडणुकांचे निकाल जाहीर झाल्यानंतर यामध्ये इंडिया आघाडीतील प्रमुख घटक पक्ष असलेल्या काँग्रेसचं तीन राज्यांमध्ये पानीपत झालं. यानंतर लगेचच या आघाडीची बैठक ६ डिसेंबर रोजी दिल्लीत पार पडणार असल्याची माहिती शरद पवार यांनी दिली होती.

पण या बैठकीची माहिती आम्हाला नसल्याचं तृणमुल काँग्रेसच्या अध्यक्षा ममता बॅनर्जी, जदयूचे प्रमुख नितीश कुमार यांनी म्हटलं होतं. त्यामुळं इडिया आघाडीत कुरबुरी सुरु झाल्याची चर्चा कालपासून सुरु झाली. अशातच आता इंडिया आघाडीच्या बैठकीची नवी तारीख जाहीर करण्यात आली आहे. (INDIA alliance meeting postpone new date has been decided as 17 December 2023)

6 डिसेंबरला होणार होती बैठक

राष्ट्रीय जनता दलाचे सुप्रिमो लालू प्रसाद यादव यांनी मंगळवारी इंडिया आघाडीच्या या बैठकीबाबत महत्वाची घोषणा केली. ही बैठक आधी ६ डिसेंबर रोजी होणार होती पण या दिवशी आघाडीतील अनेक घटक पक्षांच्या नेत्यांनी या बैठकीला हजर राहू शकणार नसल्याचं म्हटल्यानं ही बैठक पुढे ढकलण्यात आली. (Latest Marathi News)

त्यामुळं आता इंडिया आघाडीच्या सर्व पक्षांची चौथी बैठक दिल्लीमध्ये काँग्रेस अध्यक्ष मल्लिकार्जुन खर्गे यांच्या निवासस्थानी १७ डिसेंबर रोजी होणार आहे.

नेते येऊ शकणार नव्हते

यापूर्वी ६ डिसेंबरला होणाऱ्या बैठकीला ममता बॅनर्जी, अखिलेश यादव, नितीश कुमार, हेमंत सोरेन यांनी येण्यास नकार दिला होता. नितीश कुमार यांच्यावतीनं जदयूकडून लल्लन सिंह आणि संजय झा तर अखिलेश यांच्यावतीनं सपाकडून रामगोपाल यादव हे या बैठकीला हजेरी लावतील असं सांगितलं जात होतं. (Marathi Tajya Batmya)

१७ डिसेंबरला होणार बैठक

तर दुसरीकडं तामिळनाडूचे मुख्यमंत्री आणि डीएमकेचे प्रमुख एमके स्टॅलिन हे देखील या बैठकीला हजर राहू शकणार नव्हते. कारण तामिळनाडूत सध्या मिचाँग चक्रीवादळानं थैमान घातलं आहे. चेन्नईतील विमानतळही पाण्याखाली गेला आहे. त्यामुळं इथली विमान, रेल्वे ठप्प झाली आहे. तर नितीश कुमार यांची प्रकृती ठीक नाहीए. तर ममता बॅनर्जींचे ६ डिसेंबर रोजी विविध कार्यक्रम आहेत. त्यामुळं या दिवशी होणारी बैठक पुढे ढकलण्याचा निर्णय घेण्यात आला.