Asaduddin Owaisi: हिजाब घातलेली एक मुस्लीम महिला भारताची पंतप्रधान होणार; ओवैसींना विश्वास

नवी दिल्ली- एआयएमआयएम प्रमुख असदुद्दीन ओवैसी (Asaduddin Owaisi) यांना देशातील मुस्लिमांचे नेतृत्व करणारे प्रमुख नेते म्हणून ओळखले जाते. ओवैसी हे सलग चारवेळा हैदराबाद लोकसभा मतदारसंघातून खासदार आहेत. ते पुन्हा रिंगणात असून हैदराबादमध्ये १३ मे रोजी मतदान होणार आहे. ओवैसी यांनी एका वृत्त वाहिनीला दिलेल्या मुलाखतीमध्ये देशाला एक मुस्लीम पंतप्रधान मिळेल का? या प्रश्नाचे उत्तर दिले आहे.

देशाला मुस्लीम पंतप्रधान मिळेल असं तुम्हाला वाटतं का? असा प्रश्न ओवैसींना विचारण्यात आला होता. यावर ते म्हणाले आहेत की, 'इंशाल्लाह, हिजाब घातलेली एक महिला देशाचं नेतृत्व करेल. ही वेळ नक्कीच येईल. मी तो दिवस पाहण्यासाठी कदाचित जिवंत नसेल, पण हे एक दिवस होणार आहे. इंशाल्लाह.'

असदुद्दीन ओवैसी हे मुस्लिमांचे एक प्रमुख नेते म्हणून उदयाला आले आहेत. त्यांचा एमआयएम पक्ष देशभरात पाय पसरु लागला आहे. मुस्लीम, इतर मागासवर्ग आणि इतर अल्पसंख्य यांना एकत्र आणण्याचा त्यांचा प्रयत्न आहे. भाजपला हरवणे हा एमआयएमचा अजेंडा आहे. मात्र, ओवैसींनी इंडिया आघाडीसोबत जवळीक केलेली नाही. औवेसींनी महाराष्ट्र, उत्तर प्रदेश, बिहारमध्ये आपले उमेदवार उभे केले आहेत.

इंडिया आघाडीसोबत हात मिळवण्याबाबत ओवैसी म्हणाले की, आम्ही इंडिया आघाडीसोबत जाण्यास तयार नव्हतो अशी गोष्ट नाही. आमचे महाराष्ट्रातील अध्यक्ष इम्तियाज जलिल यांनी सार्वजनिकरित्या तीनवेळा इंडिया आघाडीसोबत जाण्याची इच्छा व्यक्त केली. पण, पुढून आम्हाला प्रतिसाद मिळाला नाही. त्यामुळे आम्ही एकट्यानेच लढण्याचा निर्णय घेतला. आम्ही आमचं राजकीय काम सुरुच ठेवू.

भाजपला आव्हान देणे कठीण आहे असं वाटत नाही का? असा प्रश्न ओवैसींना विचारण्यात आला होता. यावर ते म्हणाले की, आयुष्य हेच एक आव्हान आहे. जीवनात आव्हान नसतील तर मजा देखील राहात नाही. आम्ही खात्री देतो की आम्ही मेहनत करत राहू. लोकांनी ठरवलं तर आम्ही जिंकू. आम्ही जिंकलो नाही तरी आम्ही आमच्या पक्षाच्या भविष्यासाठी एक मजबूत पाया बनवतोय हे मात्र नक्की.