Terror Threat in Jammu: जम्मूमध्ये 35-40 दहशतवाद्यांच्या हालचालींमुळे सुरक्षा यंत्रणा सतर्क, पाकिस्तानी असल्याचा संशय

जम्मू विभागातील पिर पंजाल (Pir Panjal ranges) पर्वतरांगेच्या दक्षिण भागात अंदाजे 35-40 विदेशी दहशतवादी सक्रिय असल्याचे सुरक्षा सूत्रांच्या हवाल्याने एका एएनआयने दिले आहे. हे दहशतवादी पाकिस्तानच्या विशेष सेवा गटाचे माजी सदस्य असल्याचा संशय आहे. गुप्तचर संस्थांनुसार, हे विदेशी दहशतवादी राजौरी, पूंछ आणि कठुआ भागांत दहशतवाद वाढवण्याचे प्रयत्न करत आहेत. गेल्या तीन वर्षांत या भागांत काही गंभीर हल्ले झाले आहेत ज्यात हिंदू यात्रेकरू आणि सुरक्षा कर्मचाऱ्यांवर हल्ले झाले आहेत. यामुळे सुरक्षा व्यवस्थेला मोठे आव्हान निर्माण झाले आहे.

सुरक्षा यंत्रणेच्या आढावा बैठकीत कडक उपाययोजना-

सुरक्षा आढावा बैठकीत दुसऱ्या स्तरावरच्या दहशतवादी विरोधी यंत्रणेला बळकट करण्याची गरज व्यक्त करण्यात आली. आंतरराष्ट्रीय सीमेवरील घुसखोरी थांबवण्यासाठी हे आवश्यक असल्याचे सूत्रांनी सांगितले. काश्मीरमध्ये यशस्वी झालेल्या सुरक्षा उपाययोजनांची पुनरावृत्ती करून जम्मू विभागात देखील अशाच उपाययोजना राबविण्याचे निर्देश देण्यात आले.

दहशतवादी हल्ल्यांचे सत्र-

4 जून रोजी शिवखोरी मंदिराहून माता वैष्णव देवीच्या मंदिराकडे जाणाऱ्या यात्रेकरूंच्या बसवर दहशतवाद्यांनी हल्ला केला होता. हल्लेखोरांनी बसवर अंदाधुंद गोळीबार केला ज्यामुळे बस रस्त्यावरून घसरून दरीत पडली. या घटनेत 9 यात्रेकरू मृत्युमुखी पडले आणि 41 जण जखमी झाले होते.

यानंतर 11 जून रोजी कठुआ आणि डोडा जिल्ह्यात दहशतवाद्यांनी हल्ला केला. कठुआ जिल्ह्यात दोन हल्लेखोरांनी पाणी मागण्याच्या बहाण्याने घरांमध्ये घुसण्याचा प्रयत्न केला पण सतर्क नागरिकांनी त्यांना घरात प्रवेश नाकारला. 12 जून रोजी डोडा जिल्ह्यातील एका सैन्य पोस्टवर हल्ला केला ज्यात 5 सैनिक आणि एक विशेष पोलीस अधिकारी जखमी झाले.

केंद्रीय गृहमंत्र्यांचे तातडीचे निर्देश-

सुरक्षा परिस्थिती लक्षात घेऊन केंद्रीय गृहमंत्री अमित शहा यांनी 16 जून रोजी तातडीची बैठक घेतली. या बैठकीत जम्मू विभागात क्षेत्रीय नियंत्रण आणि झिरो-टेरर योजना अंमलात आणण्याचे निर्देश दिले. काश्मीरमध्ये यशस्वी झालेल्या योजनांच्या धर्तीवर जम्मूतही त्वरित आणि समन्वयित प्रतिसाद देण्याचे आदेश दिले.