किती दूर आहे Omicron भारतापासून? 'या' देशांमध्ये आढळून आले रुग्ण

कोरोना (Covid) विषाणूच्या ओमिक्रॉन (Omicron) या नवीन व्हेरिएंटने जगभरातील सर्व देशांची चिंता वाढवली आहे. ओमिक्रॉन व्हेरिएंट प्रथम दक्षिण आफ्रिकेत (South Africa) आढळला. जागतिक आरोग्य संघटनेने (WHO) देखील या व्हेरिएंटबद्दल चिंता व्यक्त केली आहे. डब्ल्यूएचओने असे नोंदवले आहे, की कोरोनाचा नवीन ओमिक्रॉन व्हेरिएंट किमान 23 देशांमध्ये पसरला आहे. डब्ल्यूएचओने भीती व्यक्त केली, की ओमिक्रॉन व्हेरिएंट अजूनही अनेक देशांमध्ये पसरू शकतो. बऱ्याच आरोग्य तज्ज्ञांनी ओमिक्रॉन व्हेरिएंटचे वर्णन डेल्टा व्हेरिएंटपेक्षाही अधिक प्राणघातक म्हणून केले आहे.

बोत्स्वाना, दक्षिण आफ्रिका, बेल्जियम, हॉंगकॉंग, इस्रायल, यूके, नेदरलॅंड्‌स, ब्राझील, कॅनडा, सौदी अरेबिया, स्वीडन, स्पेन, जर्मनी, ऑस्ट्रिया, डेन्मार्क, झेक प्रजासत्ताक, ऑस्ट्रेलिया, इटली आणि यूएसए यांसारख्या देशांमध्ये ओमिक्रॉन व्हेरिएंट दाखल झाला आहे. भारत आतापर्यंत या व्हेरिएंटपासून दूर आहे.

Omicron व्हेरिएंटची एकही केस आतापर्यंत भारतात दिसलेली नाही. केंद्रीय आरोग्यमंत्री मनसुख मांडविया यांनी नुकतीच ही माहिती दिली. नवीन व्हेरिएंट भारतात येऊ नये यासाठी सर्वतोपरी प्रयत्न केले जात असल्याचे त्यांनी सांगितले. तथापि, भारतात ओमिक्रॉन व्हेरिएंटची अनेक संशयित प्रकरणे आढळून आली आहेत. 1 डिसेंबर रोजी दिल्ली विमानतळावर लंडन आणि ऍमस्टरडॅममधील चारजण कोविड पॉझिटिव्ह आढळले. या सर्व रुग्णांना एलएनजेपी रुग्णालयात दाखल करण्यात आले असून, त्यांचे नमुने जीनोम सिक्वेन्सिंगसाठी पाठवण्यात आले आहेत.

केंद्र सरकारने ओमिक्रॉन व्हेरिएंट लक्षात घेऊन एक सल्ला दिला आहे. यासोबतच बंदरे आणि विमानतळांवर बारीक लक्ष ठेवण्यात आले आहे. संशयित कोरोना प्रकरणांचे जीनोम सिक्वेन्सिंग केले जात आहे. आरोग्यमंत्र्यांनी लोकांना कोविड मार्गदर्शक तत्त्वांचे पालन करण्याचे आवाहन केले आहे.