न्यायव्यवस्थेच्या इतिहासात पहिल्यांदाच असं घडलं; वडिलांनंतर मुलगा बनला भारताचा 'सरन्यायाधीश'

नवी दिल्ली : न्यायमूर्ती डीवाय चंद्रचूड (DY Chandrachud) यांनी भारताचे नवे सरन्यायाधीश म्हणून औपचारिकपणे शपथ घेतली. न्यायमूर्ती चंद्रचूड हे भारताचे 50 वे सरन्यायाधीश (Chief Justice) बनले आहेत.

राष्ट्रपती द्रौपदी मुर्मू (Draupadi Murmu) यांनी न्यायमूर्ती चंद्रचूड यांना राष्ट्रपती भवनात न्यायमूर्ती उदय उमेश लळीत यांच्यानंतर भारताचे 50 वे सरन्यायाधीश म्हणून पदाची शपथ दिली. यावेळी उपराष्ट्रपती जगदीप धनखर, लोकसभा अध्यक्ष ओम बिर्ला, केंद्रीय गृहमंत्री अमित शहा, संरक्षण मंत्री राजनाथ सिंह, अर्थमंत्री निर्मला सीतारामन आदी उपस्थित होते. न्यायमूर्ती चंद्रचूड यांनी निवृत्त सरन्यायाधीश यूयू लळीत यांची जागा घेतली आहे. न्यायमूर्ती डीवाय चंद्रचूड यांचा कार्यकाळ 10 नोव्हेंबर 2024 पर्यंत राहणार आहे.

न्यायमूर्ती चंद्रचूड यांचे वडील न्यायमूर्ती वायव्ही चंद्रचूड 2 फेब्रुवारी 1978 ते 11 जुलै 1985 या काळात भारताचे 16 वे सरन्यायाधीश होते. न्यायव्यवस्थेच्या इतिहासात पहिल्यांदाच पिता-पुत्र सरन्यायाधीश बनले आहेत. न्यायमूर्ती चंद्रचूड हे देशातील पुरोगामी आणि उदारमतवादी न्यायाधीश म्हणून ओळखले जातात. नागरिकांच्या मूलभूत हक्कांबाबतही ते अत्यंत संवेदनशील मानले जातात.