Karnataka Election : कर्नाटकात एन्ट्री होताच CM योगींनी उचलला आरक्षणाचा मुद्दा; म्हणाले, संविधानाच्या विरोधात..

UP CM Yogi In Karnataka : कर्नाटकातील विधानसभा निवडणुकीची (Karnataka Assembly Election) तारीख जवळ आलीये. अशा परिस्थितीत राज्यात निवडणूक प्रचाराचा जोरही वाढलाय.

उत्तर प्रदेशचे मुख्यमंत्री योगी आदित्यनाथ (Yogi Adityanath) देखील आज (बुधवार) कर्नाटकमधील भाजप उमेदवारांच्या प्रचारासाठी बाहेर पडले. योगी आदित्यनाथ यांनी म्हैसूर गाठून मंड्या जिल्ह्यात रोड शो आणि निवडणूक प्रचारात भाग घेतला. यानंतर दुपारी विजयपुरा जिल्ह्यातील बसवेश्वर मंदिरात जाऊन त्यांनी बसवण्णाचं दर्शन घेतलं.

योगी आदित्यनाथ कर्नाटक भाजपचे स्टार प्रचारक म्हणून आज त्यांच्या पहिल्या निवडणूक रॅलीत सहभागी झाले होते. आपल्या भाषणात राज्य सरकारच्या कामाचं कौतुक करताना ते म्हणाले, पीएफआय सारख्या संघटनांवर बंदी घालून त्यांचं कंबरडं मोडण्याचं काम आम्ही केलंय. एकीकडं भाजप सरकार पीएफआयवर बंदी घालत आहे तर दुसरीकडं काँग्रेस ते रोखत आहे.

यूपीच्या मुख्यमंत्र्यांनी धर्मावर आधारित आरक्षणावरून काँग्रेसवर हल्लाबोल केला. योगी म्हणाले, 'धर्माच्या आधारावर आरक्षण हे भारतीय संविधानाच्या विरोधात आहे, ते असंवैधानिक आहे. आम्ही आर्थिकदृष्ट्या गरीब, अनुसूचित जाती-जमाती, दिव्यांगजनांसाठी आरक्षणाची व्याप्ती वाढवली आहे. भारत धर्माच्या आधारावर आरक्षणाचा पुरस्कार करू शकत नाही.'

स्वातंत्र्याच्या काळाबद्दल बोलताना योगी म्हणाले, 1947 मध्ये धार्मिक आधारावर भारताची फाळणी झाली होती. धर्मावर आधारित आरक्षणाला देश पाठिंबा देऊ शकत नाही. देश दुसऱ्या फाळणीसाठी तयार नाही, असंही ते म्हणाले. एक भारत आणि श्रेष्ठ भारत ही संकल्पनाच देशाला पुढं घेऊन जाईल, यावर मुख्यमंत्र्यांनी जास्त भर दिला. मजबूत ‘डबल इंजिन सरकार’मुळं उत्तर प्रदेशात गेल्या सहा वर्षांत एकही दंगल झाली नाही, असा दावाही त्यांनी केला.