Karnataka Assembly Election Results 2023 : भाजपला मोठा धक्का! भाजपचे 8 कॅबिनेट मंत्री पिछाडीवर

कर्नाटक विधानसभेसाठी झालेल्या निवडणुकीनंतर आज मतमोजणी होत आहे. भाजप आणि काँग्रेस यांच्यात मुख्य लढत होत आहे. मतमोजणीला सुरुवात झालेली आहे. कर्नाटकमध्ये भाजप पिछाडीवर असल्याचे दिसून येत आहे. तर काँग्रेसने बहुमताचा आकडा गाठला आहे. तर भाजपचे 8 कॅबिनेट मंत्री पिछाडीवर असल्याचे दिसून येत आहेत. भाजपला हा मोठा धक्का असल्याचं म्हंटलं जात आहे. कल सातत्याने बदलताना दिसून येत आहेत.

भाजपच्या विजयासाठी पंतप्रधान नरेंद्र मोदी यांनी शेवटच्या टप्प्यात 19 सभा आणि रोड शो केले होते. मात्र तयारी करूनही भाजपचे 8 कॅबिनेट मंत्री पिछाडीवर दिसून येत आहे. दक्षिणेकडे एकमेव राज्य भाजपकडे होतं. मात्र येथे भाजपला मोठा फटका बसल्याचं दिसून येत आहे. कर्नाटकची जनता दर पाच वर्षांनी वेगवेगळ्या पक्षांना संधि देते. तीच परंपरा यावर्षीही कर्नाटकच्या जनतेने कायम ठेवली आहे.

कर्नाटक विधानसभा निवडणुकीच्या मतमोजणीस सकाळी 7 वाजल्यापासून सुरुवात झाली आहे. एकूण 224 मतदारसंघांचे निकाल आज लागणार आहे. या निवडणुकीत एकूण 2,615 उमेदवार उभे होते. त्यामुळे या सर्व उमेदवारांच्या भवितव्याचा फैसला होणार आहे.

कर्नाटकात मुख्य लढत भाजप आणि काँग्रेसमध्ये होणार आहे. तर जेडीएस पक्ष या निवडणुकीत किंगमेकरची भूमिका निभावण्याची शक्यता आहे. कर्नाटकात सध्या भाजपची सत्ता आहे. भाजप ही सत्ता राखण्यात यशस्वी ठरेल का? हे पाहणं महत्वाचं ठरणार आहे. या निवडणुकीत भाजपचा पराभव झाला तर भाजपचे दक्षिण भारतातील वर्चस्व कमी होणार आहे. त्यामुळे दक्षिणेतील या एकमेव राज्यात भाजपला सत्ता टिकवून ठेवणं हे अत्यंत महत्त्वाचं आहे.

कर्नाटकात 10 मे रोजी मतदान पार पडलं होतं. राज्यात मतदानासाठी 58,545 मतदान केंद्र तयार करण्यात आली होती. या निवडणुकीत उभ्या असलेल्या 2,615 उमेदवारांचा फैसला 5.31 कोटी मतदार करणार आहेत. राज्यात 73.19 टक्के मतदान झालं. त्यामुळे या निवडणुकीच्या निकालाकडे सर्वांचं लक्ष लागलं आहे. राज्यात विधानसभेच्या 224 जागा आहेत. तसेच बहुमतासाठी 113 चा आकडा आवश्यक आहे.

भाजपसाठी ही निवडणूक प्रतिष्ठेची होती. पंतप्रधान नरेंद्र मोदी, अमित शाह आणि केंद्रीय मंत्र्यांनी कर्नाटकात तळ ठोकला होता. कर्नाटकात पुन्हा सत्ता आणण्यासाठी या नेत्यांनी कंबर कसली होती.