Karnataka Election : भाजपनंतर आता काँग्रेसमध्ये बंडखोरी; तिकीट न मिळाल्यानं माजी खासदाराचा राजीनामा

Karnataka Election 2023 : भाजप (BJP) आणि काँग्रेसनं कर्नाटकमधील त्यांच्या उमेदवारांची यादी जाहीर केली आहे. मात्र, तिकीट न मिळालेल्या उमेदवारांनी पक्षाविरोधात बंडखोरी सुरू केली आहे.

यापूर्वी हा बंडखोरी सूर भारतीय जनता पक्षात दिसत होता. आता काँग्रेसमध्येही अशीच स्थिती पाहायला मिळत आहे. काँग्रेसचे (Congress) माजी खासदार बीव्ही नायक (BV Nayak) यांनी पक्षाचा राजीनामा दिला आहे.

त्यांना देवदुर्ग विधानसभा मतदारसंघातून तिकीट देण्यास पक्षानं नकार दिला. बीव्ही नायक यांच्या जागी त्यांच्या भावाच्या पत्नीला तिकीट देण्यात आलंय, त्यामुळं नायक यांनी काँग्रेसचा राजीनामा दिला.

राजीनामा दिल्यानंतर नायक म्हणाले, पक्षानं माझ्याकडं वारंवार दुर्लक्ष केलं. सध्या पक्षांतर्गत गटबाजी सुरू आहे. भारतीय जनता पक्ष पंतप्रधान नरेंद्र मोदी यांच्या नेतृत्वाखाली राष्ट्रहितासाठी काम करत आहे. मीही भाजपमध्ये प्रवेश करण्याचा विचार करत आहे. त्यांनी मला मानवी मतदारसंघातून विधानसभेचं तिकीट देण्याचं आश्वासन दिलंय.

याआधी मी काँग्रेसचा माजी खासदार होतो. आता बीसीसी अध्यक्ष म्हणून काम करत आहे. मी तीन मतदारसंघातून तिकिटासाठी अर्ज केला होता. काँग्रेस पक्षात माझे वडील 4 वेळा आमदार होते, मी एकेकाळचा खासदार होतो. पक्षाच्या सेवेत माझ्या कुटुंबाचं मोठं योगदान आहे. मात्र, पक्षानं माझ्याकडं वारंवार दुर्लक्ष केलं, असंही नायक यांनी स्पष्ट केलं.