Karnataka Election : बापाला भाजपकडून तिकीट मिळाल्यानं पोराचा आनंद गगनात मावेना; थेट हवेत केला गोळीबार

बंगळूर : विजापूर जिल्ह्यातील बबलेश्वर मतदारसंघातील (Bableswar Constituency) भाजपचे उमेदवार (BJP Candidate) विजूगौडा पाटील यांचा मुलगा समर्थ गौडा यानं पिस्तुलातून हवेत तीन राउंड गोळीबार करत आनंदोत्सव करत असल्याचा व्हिडिओ समोर आल्याने विरोधी काँग्रेसनं (Congress) भाजपवर जोरदार हल्ला चढविला आहे.

भाजपनं गुंड प्रवृत्तीच्या लोकांना उमेदवारी दिल्याचा घणाघाती आरोप कर्नाटक प्रदेश काँग्रेसचे प्रवक्ते संगमेश बबलेश्वर यांनी केला. वडील विजूगौडा पाटील यांना भाजपकडून उमेदवारी मिळाल्यानंतर त्यांचा मुलगा समर्थ गौडा याने पिस्तुलातून हवेत तीन राउंड गोळ झाडून विचित्र पद्धतीनं आनंद साजरा केला होता. हा व्हिडिओ आता व्हायरल झाला आहे, असा दावा संगमेश यांनी केला.

संगमेश बबलेश्वर यांनी भाजप नेत्यांना कोणत्या आधारावर उमेदवारी दिली, असा सवालही केला. हा व्हिडिओ संगमेश आणि काँग्रेसचे जिल्हाध्यक्ष राजू अलगुरु यांनी विजापूर इथं जारी केला. त्यांनी मीडिया कॉन्फरन्स बोलावून गोळीबाराचा व्हिडिओ दाखवला. बबलेश्वर मतदारसंघात भाजपच्या उमेदवाराकडून दादागिरी सुरू आहे. भाजपचे केंद्रीय मंत्री अमित शहा आणि इतर नेत्यांनी त्यांच्यावर त्वरीत कारवाई करावी, अशी मागणी काँग्रेसनं केली आहे.