शिवलिंगाच्या शुद्धीकरणासाठी हिंदू संघटनांचा दर्ग्यात घुसण्याचा प्रयत्न

कलबुर्गी जिल्ह्यातील (Kalaburagi District) अलंद येथे मंगळवारी म्हणजेच, 1 मार्च रोजी झालेल्या जातीय तणावानंतर कर्नाटक पोलिसांनी (Karnataka Police) 167 जणांना अटक केलीय. दरम्यान, परिसरात कलम 144 लागू असताना दोन्ही बाजूच्या गटांनी सोमवारी लाडले मशक दर्ग्यात (Ladle Mashak Dargah Aland, Karnataka) प्रवेश करण्याचा प्रयत्न केल्यानं शहरात तणावपूर्ण वातावरण निर्माण झालंय.

हिंदू संघटनांना नोव्हेंबर 2021 मध्ये शिवलिंगाचे 'शुद्धीकरण' करण्यासाठी विशेष प्रार्थना करायची होती. त्याच दिवशी याच आवारातील दर्ग्यात शबाब-ए-बारात कार्यक्रम आयोजित करण्याची तयारीही विशेष पंथानं केली होती. त्यामुळं पोलीस प्रशासनानं कलम 144 लागू करून 27 फेब्रुवारी ते 3 मार्च या कालावधीत परिसरात जमण्यास बंदी घातली होती. मात्र, असं असतानाही श्रीराम सेनेनं (Shriram Sena) लाडले मशक दर्गा येथील राघव चैतन्य शिवलिंगाचे शुध्दीकरण 1 मार्च रोजी करण्याची घोषणा केली आणि त्यानंतर घटनास्थळी तणावाची परिस्थिती निर्माण झाली.

पोलिसांचं म्हणणं आहे की, भाजप खासदार आणि केंद्रीय मंत्री भगवंत खुबा (Bhagwanth Khuba) यांनी पक्षाच्या कार्यकर्त्यांसह शिवलिंगाचे 'शुद्धीकरण' करण्यासाठी दर्गा परिसरात मोठी रॅली काढली होती. यादरम्यान त्यांनी बंदी असतानाही धार्मिक स्थळी प्रवेश करण्याचा प्रयत्न केला. पोलिसांनी दर्ग्याच्या आवारात फक्त 10 लोकांना शिवलिंगाची पूजा करण्याची परवानगी दिली होती. मात्र, नेत्यांनी ते मान्य न करता सर्वांना परवानगी द्यावी, असा आग्रह धरला आणि आंदोलन सुरू केलं. त्याच बरोबर इतर धर्मीय मोठ्या संख्येनं दर्ग्याजवळ जमा झाले आणि त्यांनी बॅरिकेड्स तोडण्याचा प्रयत्न केला. भाजपच्या 10 नेत्यांना परवानगी देण्याच्या निर्णयाला त्यांनी विरोध केला. यानंतर झालेल्या दगडफेकीत डीसी आणि एसीपींच्या वाहनांचं मोठं नुकसान झाल्याचं समजतंय.