माजी मुख्यमंत्री दिग्विजय सिंह यांच्याविरुध्द गुन्हा दाखल

भोपाळ : माजी मुख्यमंत्री दिग्विजय सिंह (Digvijay Singh) यांच्या खरगोन हिंसाचाराच्या (Khargone Violence) ट्विटवर भोपाळ गुन्हे शाखेनं (Bhopal Police) त्यांच्याविरोधात एफआयआर नोंदवलाय. दिग्विजय सिंह यांच्याविरुद्ध कलम 58/22, 153A(1), 295A, 465 505(2) अन्वये गुन्हा दाखल करण्यात आलाय. दिग्विजय सिंह यांनी त्यांच्या ट्विटर अकाऊंटवर एक छायाचित्र पोस्ट करत लिहिलं की, धार्मिक स्थळावर तलवार आणि ध्वज लावणं योग्य आहे का? खरगोन प्रशासनानं परवानगी दिली होती का? पण ते चित्र खरगोन किंवा एमपीचे नसून मुझफ्फरपूरचे (बिहार) होते. ही चूक लक्षात येताच त्यांनी आपली पोस्ट लगेच डिलीट केली. मात्र, या ट्विटनंतर भाजपनं दिग्विजय यांना घेरलंय.

याप्रकरणी आता गुन्हे शाखेनं तपास सुरू केलाय. दिग्विजय सिंह यांच्यावर दोन समुदायांमध्ये धार्मिक उन्माद पसरवणे, बनावट कागदपत्रे वापरणे, सार्वजनिक ठिकाणी अफवा पसरवणे या प्रकरणी गुन्हा दाखल करण्यात आलाय. भाजप कार्यकर्त्यांनी भोपाळमधील गुन्हे शाखा गाठून दिग्विजय सिंह यांच्याविरोधात तक्रार केलीय. प्रकाश पांडे यांच्या तक्रारीवरून दिग्विजय सिंह यांच्यावर गुन्हा दाखल करण्यात आलाय.

माजी मुख्यमंत्री दिग्विजय सिंह यांच्या या ट्विटवर मुख्यमंत्री शिवराज सिंह चौहान यांनी तीव्र आक्षेप घेतला होता. ते म्हणाले होते, माजी मुख्यमंत्री दिग्विजय सिंह यांना राज्यात उन्माद पसरवायचा आहे. राज्याला दंगलीच्या आगीत ढकलण्याचा त्यांचा डाव आहे. ते खपवून घेतलं जाणार नाही. मंत्रिमंडळाच्या बैठकीत मुख्यमंत्री शिवराज सिंह चौहान यांनी दिग्विजय सिंह यांच्यावर सोशल मीडियावर पोस्ट केलेल्या फोटो आणि पोस्टवरून धार्मिक उन्माद पसरवल्याचा आरोप केला होता.