या हाहाकारासाठी फक्त मोदी सरकार जबाबदार; 'द लॅन्सेट'ची कडवी टीका

नवी दिल्ली : मेडीकल जर्नल लॅन्सेटमध्ये भारतातील कोरोना परिस्थितीवरुन मोदी सरकारवर कठोर टीका करण्यात आली आहे. कोरोना परिस्थिती हाताळण्यापेक्षा ट्विटरवरील टीकेचे ट्विट्स काढून टाकण्यावर मोदी सरकारने अधिक भर दिला असल्याची टीका या नियतकालिकाच्या संपादकीयमध्ये करण्यात आली आहे. देशात कोरोना संसर्गाचा मोठा स्फोट झाला असून या पार्श्वभूमीवर ‘द लॅन्सेट'ने संपादकीयमधून पंतप्रधान मोदींवर टीका केली आहे. कोरोनाची परिस्थिती नियंत्रणात आणण्यापेक्षा टीकाकारांची तोंड दाबण्यास मोदींचं प्राधान्य दिसत असल्याचं असल्याचंही लॅन्सेटनं म्हटलं आहे. कोरोना संकटादरम्यान त्यांच्यावर आणि त्यांच्या सरकारवर टीका करणाऱ्यांची मुस्कटदाबी करण्याचा सरकारचा प्रयत्न हा माफ करण्याजोगा नाहीये, असं देखील या संपादकीय म्हणण्यात आलंय.

पुढे या संपादकीयामध्ये ‘इन्स्टिट्यूट फॉर हेल्थ मेट्रिक्स अँड इव्हॅल्युएशन’ या संस्थेनं दिलेल्या इशाऱ्याचा हवाला देण्यात आला आहे. त्यात म्हटलंय की, येत्या 1 ऑगस्टपर्यंत भारतात दहा लाख लोकांचा मृत्यू कोरोनामुळे होईल, असा अंदाजदेखील यात बांधण्यात आला आहे. जर असं घडलं तर या स्वनिर्मित हाहाकारासाठी केवळ आणि केवळ मोदी सरकारच जबाबदार असेल, असं देखील म्हणण्यात आलंय.

कोरोनाचा मोठ्या प्रमाणावर होणाऱ्या प्रादुर्भावाबद्दल आधीच पूर्वसुचना देऊन देखील सरकारने अनेक धार्मिक कारणासाठी देशभरातून जमून गर्दी करण्यास परवानगी दिली. यासोबतच निवडणुकीसाठी मोठमोठाल्या सभादेखील भरवण्यास परवानगी देण्यात आली. कोरोना संकटाच्या काळात केली जाणारी टीका आणि मोकळ्या चर्चेमध्ये आडकाठी आणण्याची मोदी सरकारची ही वृत्ती अक्षम्य आहे, अशीदेखील घणाघाती टीका लॅन्सेटने केली आहे.

कोरोनाला आळा घालण्यासाठी प्रतिबंधात्मक उपायांचा प्रचंड अभाव देशात आहे. केवळ रुग्णसंख्या कमी झाली म्हणून कोरोनावर विजय मिळविल्याच्या फुशारक्या मारण्यास केंद्रीय आरोग्यमंत्र्यांसहित सरकारने सुरूवात केली. हे सगळं कोरोनाच्या नव्या स्ट्रेनसह देशात दुसरी लाट येण्याचा इशारा दिला जात असताना सरकारने केलं आहे, अशी घणाघाती टीकादेखील या संपादकीयात करण्यात आली आहे.