इंधनाच्या दरांवरील 'लॉकडाऊन' हटवला; राहुल गांधींचा केंद्रावर हल्लाबोल

नवी दिल्ली : उत्तर प्रदेश, पंजाबसह पाच राज्यांमध्ये नुकत्याच पार पडलेल्या विधानसभा निवडणुकीत दारूण पराभवाला सामोरे जावे लागलेल्या काँग्रेसने मंगळवारी पेट्रोल, डिझेल आणि स्वयंपाकाच्या गॅसच्या किमतीत वाढ केल्यानंतर केंद्र सरकारवर जोरदार हल्लाबोल केला आहे. याबाबत राहुल गांधी (Rahul Gandhi) यांनी ट्वीट करत इंधनाच्या किमतींवर लागू करण्यात आलेला 'लॉकडाऊन' हटवण्यात आल्याचे म्हंटले आहे. (Rahul Gandhi Tweet After Fuel Prices Hike)

पेट्रोल, डिझेल आणि स्वयंपाकाच्या गॅसच्या किमतीत वाढ केल्यानंतर राहुल यांनी ट्वीट करत म्हटले आहे की, ''गॅस, डिझेल आणि पेट्रोलच्या किमतींवर लागू करण्यात आलेला 'लॉकडाऊन' उठवण्यात आला आहे. आता सरकार दर सातत्याने 'विकास' करणार असून, महागाईच्या साथीबद्दल पंतप्रधानांना विचारा, ते थाळी वाजवा असे सांगतील, असे खोचक विधान केले आहे.

महा महागाई, भाजपाने आणली : रणदीप सुरजेवाला

पक्षाचे मुख्य प्रवक्ते रणदीप सुरजेवाला (Randeep Surjewala) यांनी ट्वीट केले की, 'महा-महागाई, भाजपाने आणली! आता गॅस सिलेंडरच्या दरामध्ये 50 रुपयांची वाढ झाली आहे. गॅस सिलिंडर - दिल्ली आणि मुंबईत 949.50 रुपये, लखनऊमध्ये 987.50 रुपये, कोलकात्यात 976 रुपये आणि चेन्नईमध्ये 965.50 रुपये मोजावे लागणार आहे. या महागाईनंतर त्यांनी सरकारवर ताशेरे ओढत 'लोक म्हणत आहेत की, कोई लौटा दे वो सच्चे-सस्ते दिन, नहीं चाहिए (नरेंद्र) मोदी जी के अच्छे दिन.’

आणखी एक ट्वीटमध्ये सुरजेवाला म्हणाले की, "भाजपच्या विजयाने मोदीजींचे "महागडे दिवस" ​परत आले आहेत. भाजपला विजयाचा दिलासा मिळताच महागाईने जनतेचे जगणे हैराण केले आहे. उत्तर प्रदेशमध्ये अमित शहांनी निवडणुका जिंका आणि होळीच्या दिवशी मोफत गॅस सिलिंडर मिळवा, असे म्हटले होते. फुकट देत नाही, पण आता महागात देत असल्याची टीका सुरजेवाला यांनी केली आहे.