दिल्लीतील सर्वात मोठ्या कोविड रुग्णालयाचे संचालक कोरोना पॉझिटिव्ह

नवी दिल्ली : कोरोनाचा प्रादुर्भाव दिल्लीत मोठ्या प्रमाणात होत असतानाच आता दिल्लीतील सर्वात मोठ्या कोविड रुग्णालयाचे संचालक आणि यूनिव्हर्सिटी कॉलेज ऑफ मेडिकल सायन्सचे अधिष्ठाता यांना कोरोनाचा संसर्ग झाला आहे.

ताज्या बातम्यांसाठी डाऊनलोड करा ई-सकाळचे ऍप 

पुण्याच्या बातम्या वाचण्यासाठी येथे  क्लिक करा

काही दिवसांपूर्वीच लोक नायक रुग्णालयाच्या संचालकपदी नियुक्ती करण्यात आलेल्या डॉ. सुरेश कुमार यांना कोरोनाची लागण झाल्याचं समोर आलं आहे. डॉ. सुरेश कुमार यांना कोरोना झाल्याचं निष्पन्न होताच आम्ही संपर्कात आलेल्या व्यक्तींचा शोध घेणं सुरू केलं. जवळपास वरिष्ठ डॉक्टरांसह ३० आरोग्य कर्मचाऱ्यांची तपासणी करण्यात आली आहे. त्यातच शनिवारी सकाळी आणखी दोन कर्मचाऱ्यांचे रिपोर्ट पॉझिटिव्ह आले आहेत. प्रशासनानं हॉस्पिटल स्वच्छ करण्यासाठी काही काळ बंद केलं होतं, अशी माहिती रुग्णालयातील वरिष्ठ डॉक्टरांनी दिली. लोक नायक रुग्णालय सध्या कोविड हॉस्पिटल असून तिथे फक्त कोरोना रुग्णावर उपचार केले जात आहेत. सध्या या रुग्णालयात २ हजार बेडची व्यवस्था आहे.

मागील काही दिवसांत दिल्लीत करोनाचा उपद्रव वाढला असून, रुग्णसंख्येत अचानक वाढ झाल्यानं सरकारसमोरील आव्हानात भर पडली आहेत. करोनाचा प्रसार थांबवण्यासाठी दिल्ली सरकार शर्थीचे प्रयत्न करत असतानाच कोविड रुग्णालयाच्या संचालकांना कोरोना झाल्याचे समोर आल्याने दिल्लीकरांच्या चिंतेत भर पडली आहे. देशात मुंबईनंतर दिल्लीतील रुग्णांच्या संख्येत मोठी वाढ झाली आहे. त्यामुळे केजरीवाल सरकारकडून कोरोनाचा प्रसार रोखण्यासाठी चार कलमी कार्यक्रम हाती घेण्यात आला आहे.

दरम्यान, दिल्लीत आरोग्य सेवेत कार्यरत असलेल्या अनेक महत्त्वाच्या अधिकाऱ्यांना कोरोनाचा संसर्ग झाल्याच्या घटना समोर आल्या आहेत. काही दिवसांपूर्वी राम मनोहर लोहिया रुग्णालयातील अटल बिहारी वाजपेयी इन्सिस्ट्यूट ऑफ मेडिकल सायन्सचे अधिष्ठातांना कोरोना झाला होता. त्यानंतर डॉ. राजीव सूद यांना एका रुग्णालयात दाखल करण्यात आलं होतं. कोरोनासंबंधित काम करणाऱ्या कर्मचाऱ्यांचं नियोजन सूद यांच्याकडे होतं. दिल्लीत आतापर्यंत ६०० आरोग्य कर्मचाऱ्यांना करोनाचा संसर्ग झाला आहे. दिल्लीतील कोरोनाग्रस्त रुग्णांची संख्या सध्या १७,००० इतकी आहे.