Loksabha Election : 'भाजप-धजद युतीची अद्याप वेळ आली नाही'; कुमारस्वामींच्या वक्तव्याने खळबळ, BJP बॅकफूटवर?

बंगळूर : आगामी लोकसभा निवडणुकीच्या (Loksabha Election) पार्श्वभूमीवर राज्यातील राजकीय हालचालींना वेग आला आहे. धजद-भाजप युतीची भाजप नेते व माजी मुख्यमंत्री बी. एस. येडियुराप्पा (B. S. Yediyurappa) यांनी शुक्रवारी (ता. ८) घोषणा केली. मात्र, धजद नेते आणि माजी मुख्यमंत्री एच. डी. कुमारस्वामी (H. D. Kumaraswamy) यांनी युतीची वेळ अद्याप आली नसल्याचे सांगून अनिश्चितता व्यक्त केली.

जे. पी. नगर (बंगळूर) येथील तिरुमलागिरी मंदिरात विशेष पूजा आणि होम कार्यक्रमात सहभागी झाल्यानंतर पत्रकारांशी बोलताना कुमारस्वामी म्हणाले की, आगामी लोकसभा निवडणुकीसाठी युतीबाबत या टप्प्यावर काहीही बोलणार नाही. युतीसाठी योग्य वेळ आलेली नाही. माजी पंतप्रधान एच. डी. देवेगौडा (H. D. Deve Gowda) युतीची घोषणा करण्यापूर्वी नेते आणि कार्यकर्त्यांशी चर्चा करतील.

अस्तित्वासाठी युती आवश्यक

धजद सुकाणू समितीचे अध्यक्ष, आमदार जी. टी. देवेगौडा यांनी मात्र धजदच्या अस्तितिवासाठी भाजपसोबत युती आवश्यक असल्याचे मत व्यक्त केले. पत्रकारांशी बोलताना ते म्हणाले, लोकसभा निवडणुकीसाठी युती करण्याची विनंती मी पक्षाचे ज्येष्ठ नेते एच. डी. देवेगौडा यांना केली आहे. नुकत्याच झालेल्या पक्षाच्या बैठकीत आमदार, विधान परिषद सदस्य आणि नेते सहभागी झाले होते. आम्हाला काँग्रेससोबत जायचे नाही. आघाडी सरकारमध्ये कुमारस्वामी यांना काँग्रेसने मुख्यमंत्रीपदावरून हटवले होते.

येडियुराप्पा यांनी शुक्रवारी सांगितले होते की, आगामी लोकसभा निवडणुकीसाठी भाजपने धजदसोबत युती केल्यास राज्यात भाजप मजबूत होईल. युती करून जास्त जागा जिंकणे शक्य आहे. यासंदर्भात नवी दिल्लीत चर्चा सुरू आहे. धजदचे ज्येष्ठ नेते आणि माजी पंतप्रधान देवेगौडा यांनी पंतप्रधान नरेंद्र मोदी आणि केंद्रीय गृहमंत्री अमित शहा यांच्याशी चर्चा केली आहे. दोन्ही पक्षांच्या नेत्यांनी युती करण्यास सहमती दर्शवली आहे. शाह यांनी लोकसभेच्या चार जागा धजदला देण्याचे मान्य केले आहे.