लुधियाना स्फोटानंतर तपास यंत्रणांना मोठ्या घातपाताचा संशय

गुरुवारी लुधियाना (Ludhiana) कोर्ट बॉम्बस्फोटात घातक (Pentaerythritol tetranitrate) स्फोटकं वापरली गेली आहेत. फॉरेन्सिक टीम तसेच बॉम्ब शोधक आणि नाशक पथकाने प्राथमिक तपासणीनंतर ही माहिती दिली आहे. पंजाबमध्ये झालेल्या स्फोटात एकाचा मृत्यू झाला असून, पाच जण जखमी झाले आहेत.

पंजामधील लुधियाना शहरात असलेल्या जिल्हा सत्र न्यायालयात स्फोट झाला होता. या स्फोटानं पुन्हा एकदा पंजाबला हाय अलर्ट देण्यात आला आहे. पोलिसांनी केलेल्या तपासानुसार जिल्हा सत्र न्यायालयाच्या दुसऱ्या मजल्यावरील शौचालयात दुपारी साडेबाराच्या दरम्यान हा स्फोट घडवण्यात आला आहे. पुढील काही तास अत्यंत महत्त्वाचे असून, चाचण्यांमधून बॉम्ब नेमक्या कोणत्या प्रकारचा होता हे कळणार आहे.

दरम्यान, सूत्रांनी सांगितले की, लुधियाना न्यायालयातील बॉम्बस्फोटातील पीडितेची ओळख अद्याप पटलेली नाही. मृतदेह अत्यंत विकृत झाल्याने ओळख पटू शकलेली नाही. शरीरावर फक्त एक टॅटू दिसत होता, ज्यामुळे मृत व्यक्तीची ओळख पटू शकलेली आहे.