गांधी हत्येच्या चौकशीसाठी आयोग नेमण्याची रणजीत सावरकरांची मागणी; ''गांधींचा मृत्यू नथुरामच्या गोळीने नव्हे तर...''

मुंबईः महात्मा गांधी यांची हत्या नथुराम गोडसेच्या बंदुकीच्या गोळीने झालेली नाही. गांधींच्या जखमा आणि नथुरामकडील पिस्तुल, यामध्ये तफावत आहे. त्यामुळे पुन्हा एकदा गांधी हत्येची चौकशी करण्यासाठी आयोग नेमा, अशी मागणी रणजीत सावरकर यांनी केली आहे.

'एबीपी माझा'शी बोलताना रणजीत सावरकर म्हणाले की, बंदुकीच्या गोळ्या लागल्यानंतर महात्मा गांधी यांच्या शरीरावर झालेल्या जखमा ह्या ४.२३ एमएम आणि ६.५ एमएम अशा होत्या. नथुरामचं पिस्तुल हे ९ एमएमचं होतं. शिवाय ज्या दिशेने गोळ्या झाडलेल्या आहेत त्या दिशादेखील निराळ्या आहेत.

सावरकर पुढे म्हणाले, नथुरामच्या बंदुकीतून गोळ्या झाडल्या असत्या तर त्याची डायरेक्शन सरळ पाहिजे होती, ती नाहीये. पॉईंट २२ किंवा पॉईंट २५ अशा पिस्तुलातून गांधींवर गोळ्या झाडण्यात आलेल्या होत्या. ज्यांनी ती हत्या केली त्यांना लपवण्यात आलेलं आहे. त्यामुळे सरकारने याबाबत कसून चौकशी केली पाहिजे, अशी त्यांनी मागणी केलीय.

''गांधी हत्येनंतर तत्कालीन सरकारने तेव्हा कपूर कमिशन नेमला होता, तसाच आता दुसरा कमिशन नेमण्याची गरज आहे. दडपलेले सगळे पुरावे बाहेर काढून प्रकरणाची पुन्हा चौकशी करावी'' अशी मागणी रणजीत सावरकर यांनी केली आहे.