हावडा - अतिक्रमणे, अस्वच्छता, बेकायदा बांधकामे याबाबत जनतेच्या मनात असलेला संताप आज मुख्यमंत्री ममता बॅनर्जी यांच्या तोंडून बाहेर पडला. नबाना भागात दिलेल्या भेटीदरम्यान त्यांनी तेथील गैरकारभार आणि पालिका प्रशासनाच्या निष्क्रियतेवरून मंत्री, सरकारी अधिकारी, पोलिस या सर्वांना चांगलेच धारेवर धरले. रस्त्यांवरची अस्वच्छता पाहून तर, ‘आता मी रस्ते झाडू का?,’ असा संतप्त सवालही त्यांनी अधिकाऱ्यांना विचारला.
ममता यांनी आज नबाना शहरातील सॉल्ट लेक आणि हावडा परिसराची पाहणी केली. यावेळी त्यांना अनेक बेकायदा बांधकामे, पदपथांवर कब्जा मिळवलेले फेरीवाले आणि अस्वच्छ रस्ते दिसले. या सर्व प्रकारांना पाठीशी घालत असल्याबद्दल त्यांनी नंतर झालेल्या बैठकीत मंत्री, पोलिस आणि पालिकेच्या अधिकाऱ्यांना फैलावर घेतले. ७० मिनिटे चाललेल्या या बैठकीत ममतांनी अधिकाऱ्यांच्या कार्यक्षमतेवरही प्रश्‍नचिन्ह उपस्थित केले.
सॉल्ट लेक परिसरातील अतिक्रमणांना पाठीशी घालत असल्याबद्दल ममतांनी विधाननगर मतदारसंघाचे आमदार सुजित बोस यांचे नाव घेऊन त्यांना सुनावले. बोस यावेळी ममतांच्या शेजारच्याच खुर्चीत बसले होते. रस्त्यांवर प्रचंड प्रमाणात घाण दिसून आल्याचे सांगत ममतांनी ‘आता मी रस्ते झाडू का?,’ असा संताप व्यक्त केला.
दहा दिवसांची मुदत
अतिक्रमण प्रकारात मंत्री, खासदार, जिल्हाधिकारी, आमदार कोणीही दोषी आढळल्यास गय करू नका, अशा सक्त सूचना ममतांनी पोलिसांना दिल्या आहेत. दिलेल्या सूचनांवर कारवाई करण्यासाठी ममतांनी अधिकाऱ्यांना दहा दिवसांची मुदत दिली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.