ममतांच्या भाच्याला पुन्हा ‘ईडी’चे समन्स

नवी दिल्ली : पश्‍चिम बंगालमधील कोळसा गैरव्यवहाराशी संबंधित आर्थिक अफरातफरीप्रकरणी सक्तवसुली संचालनालयाने (ईडी) पश्‍चिम बंगालच्या मुख्यमंत्री ममता बॅनर्जी यांचा भाचा अभिषेक बॅनर्जी आणि त्यांच्या पत्नीला आज समन्स बजावले असून त्यांची याप्रकरणी चौकशी होण्याची शक्यता आहे.

अभिषेक बॅनर्जी हे डायमंड हार्बर या लोकसभा मतदारसंघाचे नेतृत्व करतात. तृणमूल काँग्रेसचे ते राष्ट्रीय सरचिटणीस देखील आहेत. सहा सप्टेंबर रोजी त्यांना तपास अधिकाऱ्यांसमोर हजर राहण्यास सांगण्यात आले असून त्यांच्या पत्नी रूजिरा यांना १ सप्टेंबर रोजी चौकशीला सामोरे जाण्यास सांगण्यात आले आहे. या प्रकरणाशी संबंधित अन्य मंडळींना देखील चौकशीला उपस्थित राहण्यास सांगण्यात आले असून त्यांनाही वेगवेगळ्या तारखा देण्यात आल्या आहेत.

कोळसा गैरव्यवहारप्रकरणी केंद्रीय अन्वेषण विभागाने (सीबीआय) मागील वर्षी अभिषेक बॅनर्जी यांच्याविरोधात एफआयआर दाखल केला होता. आता याच ‘एफआयआर’चा आधार घेत ‘ईडी’ने कारवाई करायला सुरूवात केली आहे. अनुप माझी उर्फ लाला हा या गैरव्यवहारातील मुख्य सूत्रधार असल्याचे बोलले जाते. या बेकायदा कोळसा व्यवहारातून मिळालेल्या मोठ्या निधीचे अभिषेक बॅनर्जी हे देखील लाभार्थी असल्याचे सांगितले जाते.

केंद्र सरकार आमच्याशी राजकीय आघाडीवर लढू शकत नाही त्यामुळेच तपास संस्थांचा वापर केला जात आहे. भाजप मंत्र्यांचे कोळसा माफियांशी लागेबांधे असून ही मंडळी निवडणूक प्रचाराच्या काळात त्यांच्या हॉटेलमध्ये मुक्कामाला होती. - ममता बॅनर्जी, मुख्यमंत्री पश्‍चिम बंगाल