पतीच्या इशाऱ्यानंतरही परपुरुषाला अपरात्री फोन करणं म्हणजे वैवाहिक क्रूरपणा: हायकोर्ट

केरळ हायकोर्टाने अलिकडेच एका जोडप्याचा घटस्फोट मंजूर करताना म्हटलंय की, पतीने दिलेल्या इशाऱ्याला दुर्लक्षित करुन एका पत्नीकडून एखाद्या दुसऱ्या पुरुषाला गुप्तपणे फोन कॉल करणे हा प्रकार वैवाहिक क्रूरतेसारखाच आहे. न्यायाधीश कौसर एडप्पागथ यांनी आपल्या आदेशामध्ये असंही म्हटलंय की, जोपर्यंत वैवाहिक जीवन पूर्ववत होत नाही, तोपर्यंत केवळ तडजोड करणे म्हणजे क्रूरतेचं समर्थन होणार नाही. (Keral HighCourt)

पतीच्या वारंवार इशाऱ्यानंतरही त्याची अवहेलना करत पत्नीद्वारे एखाद्या अन्य पुरुषाला वारंवार संधी पाहून कॉल करणे, ते ही उशीरा रात्री हा वैवाहिक क्रूरतेसारखाच प्रकार आहे.

या प्रकरणी हायकोर्टाच्या समक्ष पतीने याचिका दाखल करुन फॅमिली कोर्टाच्या आदेशाला आव्हान दिलं होतं. पतीने व्यभिचार आणि क्रूरतेच्या आधारावर घटस्फोटाची मागणी करुन फॅमिली कोर्टाचा दरवाजा ठोठावला होता. मात्र, त्याची ही याचिका फेटाळली गेली होती.

पतीने असा दावा केला होता की, लग्नाच्या सुरुवातीपासूनच पत्नीने त्याच्या आयुष्याला एकप्राकरे नर्क बनवून अनेक प्रकारची अनैतिक कृत्ये केली आहेत. त्याने असाही आरोप केला की त्याच्या पत्नीचे लग्नाआधी दुसऱ्या पुरुषासोबत अनैतिक संबंध होते, जे लग्नानंतरही तसेच सुरु राहिले.

पतीकडून बाजू मांडणारे वकील टी.एन.रमन कार्था यांनी पुढे म्हटलंय की, BSNL कडून प्राप्त झालेल्या सीडीच्या प्रिंटआऊटवर लक्ष दिल्यास असं दिसून येतंय की पत्नी आणि परपुरुषासोबत सातत्याने फोन कॉल्स झाले आहेत, जे एका अनैतिक संबंधांकडे इशारा करतात.

मात्र, पत्नीकडून बाजू मांडताना वकिल एम.बी. संदीपने या दाव्याचं खंडन करत म्हटलंय की, ती कधीतरीच एखाद्या विशेष वेळी त्या व्यक्तीला फोन करत होती.

मात्र, कोर्टाने असं म्हटलंय की, फक्त ती फोन करत होती यावरुन त्यांच्यातील नाते अनैतिक अथवा चुकीचे संबंध होते, असं ठरत नाही. मात्र, पतीच्या वारंवार इशाऱ्यानंतरही त्याची अवहेलना करत पत्नीद्वारे एखाद्या अन्य पुरुषाला वारंवार संधी पाहून कॉल करणे, ते ही उशीरा रात्री हा वैवाहिक क्रूरतेसारखाच प्रकार आहे, असं न्यायालयाने म्हटलंय.