हिंदीमधून ‘एमबीबीएस’

भोपाळ : वैद्यकीय अभ्यासक्रमासाठीच्या हिंदीतील तीन पुस्तकांचे आज केंद्रीय गृहमंत्री अमित शहा यांच्या हस्ते प्रकाशन झाले. वैद्यकीय शिक्षणाशी संबंधित सर्व विषयांची पुस्तके हिंदीमधून प्रकाशित करण्याचा प्रकल्प मध्य प्रदेश सरकारने हाती घेतला आहे. त्यामुळे ‘एमबीबीएस’ अभ्यासक्रम हिंदीमधून सुरू करणारे मध्य प्रदेश पहिले राज्य ठरले आहे, असे कौतुकोद्‍गार शहा यांनी यावेळी काढले.

मेडिकल बायोकेमिस्ट्री, अॅनाटॉमी आणि मेडिकल फिजिओलॉजी ही तीन पुस्तके हिंदीत आहेत. अमित शहा म्हणाले, ‘‘पंतप्रधान नरेंद्र मोदी हे सर्व आंतरराष्ट्रीय समारंभातही हिंदीमधून बोलतात. त्यातून जगाला एक संदेश मिळतो. तसेच भारतातील युवकांचाही आत्मविश्‍वास वाढतो. देशातील शैक्षणिक क्षेत्रासाठी आजचा दिवस महत्त्वाचा आहे. या दिवसाची इतिहासात सुवर्णाक्षरांनी नोंद होईल.’’

वैद्यकीय अभ्यासक्रम मातृभाषेतून शिकविण्याचे समर्थन करणाऱ्यांसाठी आजचा दिवस मोठा आहे. आता स्वभाषेतूनच शिक्षण मिळण्यास सुरूवात झाली आहे. शिक्षणामध्ये भाषेचा अडसर येणार नाही. कोणत्याही व्यक्तीची विचार करण्याची प्रक्रिया त्याच्या मातृभाषेतूनच घडते, असेही ते म्हणाले.

‘‘जगभरातील शिक्षणतज्ज्ञांनी मातृभाषेतील शिक्षणाला महत्त्व दिले आहे. भारतातही वैद्यकीय, अभियांत्रिकी, व्यवस्थापन आणि कायद्याचे शिक्षण हिंदीसह देशातील विविध राज्यांत मातृभाषेतून होईल. अनेक देशांत ‘ब्रेन ड्रेन’बद्दल बोलले जाते. पंतप्रधान मोदींनी मात्र ‘ब्रेन गेन’चा मुद्दा आग्रहाने मांडला,’’ असेही शहा यांनी स्पष्ट केले.