MHA: अनुकंपा नियुक्ती धोरणात बदल, गृहमंत्रालयाचा मोठा निर्णय

नवी दिल्ली : गृह मंत्रालयाने अनुकंपा नियुक्त्यांबाबतच्या धोरणात मोठा बदल करण्याचा निर्णय घेतला आहे. त्यानुसार आता सेवेत असताना मृत्यू झालेल्या आणि वैद्यकीय कारणास्तव निवृत्त झालेल्या कर्मचाऱ्यांच्या नातेवाईकांनाही अनुकंपाद्वारे नियुक्ती मिळणार आहे. या धोरणामुळे केंद्रीय गृह मंत्रालयाच्या अंतर्गत काम करणार्‍या सर्व कर्मचार्‍यांना फायदा होण्याची अपेक्षा आहे. (MHA New Guidline For Compassionate)

सुधारणा करण्यात आलेल्या तत्त्वांनुसार यामध्ये केंद्रीय निमलष्करी दलाच्या जवानांचा समावेश असणार आहे. जे अनेकदा दहशतवादी हल्ले, चकमकी आणि आत्महत्यांसारख्या घटनांचे बळी पडतात. गृह मंत्रालयाच्या मार्गदर्शक तत्त्वांनुसार, अनुकंपापोटी नियुक्ती योजनेचा उद्देश सरकारी कर्मचाऱ्याच्या कुटुंबातील आश्रित सदस्याला अनुकंपा तत्त्वावर नोकऱ्या उपलब्ध करून देणे हा आहे. या निर्णयामुळे संबंधित कर्मचाऱ्यांच्या कुटुंबीयांना आर्थिक चणचण आणि आपत्कालीन परिस्थितीवर मात करण्यास मदत होणार आहे.

नवीन मार्गदर्शक तत्त्वांनुसार कुटुंबाच्या आर्थिक स्थितीचे एकूण मूल्यमापन, कमावणारे सदस्य, कुटुंबाचा आकार, मुलांचे वय इत्यादी बाबी विचारात घेऊन नियुक्ती करताना निर्णय घेण्याच्या सूचना देण्यात आल्या आहेत. वरील बदलामुळे अनुकंपा नियुक्ती प्रक्रियेत अधिक पारदर्शकता आणि निष्पक्षता येईल असे एका अधिकाऱ्याने सांगितले.