धक्कादायक! दारू पिऊन अल्पवयीन दलित मुलीवर सामूहिक अत्याचार; काही महिन्यांपूर्वीच तिच्या आई-वडिलांचं झालं होतं निधन

हैदराबाद : तेलंगणातील हैदराबाद (Telangana Hyderabad) इथं अल्पवयीन मुलीवर सामूहिक बलात्काराची धक्कादायक घटना उघडकीस आलीये. ही घटना रविवारी मीरपेठ पोलिस ठाण्याच्या हद्दीत नंदनवन कॉलनीत घडली. याप्रकरणी पीडितेनं पोलिस ठाण्यात तक्रार दिली आहे.

पीडितेनं दिलेल्या तक्रारीनुसार, आठ युवकांची टोळी घरात घुसली आणि त्यांनी तिला धमकावलं. त्यानंतर चौघांनी तिला वरच्या मजल्यावर नेलं आणि मद्यधुंद स्थितीत अत्याचार केले. यावेळी मदतीसाठी पीडितेनं हाका मारल्या असता आरोपी पळून गेले. या आरोपीत काही गुंडांचा देखील समावेश होता.

याप्रकरणी पोक्सो कायद्यार्तंगत गुन्हा दाखल करण्यात आला असून पीडितेची वैद्यकीय तपासणी केली जात आहे. आरोपीला पकडण्यासाठी पोलिसांची सात पथके तयार केली आहेत. परिसरातील सीसीटीव्ही फुटेजची मदत घेतली जात आहे. याप्रकरणी काही संशयितांना ताब्यात घेतले असून त्यांची चौकशी सुरू आहे.

मुख्य आरोपी अद्याप फरार आहेत. रचकोंडाचे पोलिस आयुक्त डी. एस. चौहान यांनी घटनास्थळाची पाहणी केली. ती दलित समुदायातील असून दिलसुखनगर भागातील एका कपड्याच्या दुकानात काम करते. काही महिन्यांपूर्वीच तिच्या आई-वडिलांचं निधन झालं. त्यानंतर ती नातेवाईकांकडं राहत होती.