मोहम्मद जुबेरला १४ दिवसांची न्यायालयीन कोठडी; पोलिस कोठडीस नकार

नवी दिल्ली : आक्षेपार्ह ट्विटप्रकरणी उत्तर प्रदेशच्या लखीमपूर न्यायालयाने ऑल्ट न्यूजचे सह-संस्थापक मोहम्मद जुबेरला (Mohammed Zubair) १४ दिवसांची न्यायालयीन कोठडीत (judicial custody) पाठवण्याचा निर्णय दिला आहे. जुबेरला २५ जुलैपर्यंत न्यायालयीन कोठडीत (judicial custody) राहावे लागणार आहे. त्याची पोलिस कोठडी देण्यास न्यायालयाने नकार दिला. जुबेरच्या जामीन अर्जावर न्यायालय १३ जुलै रोजी सुनावणी करणार आहे. (Mohammed Zubair Latest News)

सप्टेंबर २०२१ मध्ये आक्षेपार्ह ट्विट केल्याप्रकरणी जुबेरविरोधात गुन्हा दाखल करण्यात आला होता. जुबेरला (Mohammed Zubair) आता सीतापूर कारागृहात राहावे लागणार आहे. आक्षेपार्ह ट्विट केल्याप्रकरणी दिल्लीच्या न्यायालयाने जामीन अर्ज फेटाळल्यानंतर झुबेरला उत्तर प्रदेशमधील सीतापूर येथे नेण्यात आले. जिथे तीन व्यक्तींविरुद्ध ट्विटद्वारे धार्मिक भावना भडकावल्याप्रकरणी गुन्हा दाखल करण्यात आला आहे.

ट्विटमध्ये महंत बजरंग मुनी, नरसिंहानंद सरस्वती आणि आनंद स्वरूप यांना लक्ष्य करण्यात आले होते. तिघांनाही द्वेष पसरवणारे असल्याचे सांगण्यात आले आहे. खैराबाद क्षेत्र हिंदू शेर सेनेचे जिल्हाध्यक्ष भगवान शरण यांच्या तक्रारीवरून हा गुन्हा दाखल करण्यात आला आहे. ही तक्रार ऑल्ट न्यूजचे सह-संस्थापकांविरुद्ध १ जून रोजी दाखल करण्यात आली होती.

२७ जून रोजी पहिल्यांदा अटक

२७ जून रोजी मोहम्मद झुबेरला (Mohammed Zubair) पहिल्यांदा अटक करण्यात आली होती. जेव्हा ट्विटर पोस्टच्या आधारे एफआयआर नोंदवण्यात आला होता. तेव्हा हिंदूंच्या भावना दुखावल्याचा आरोप मोहम्मद झुबेरवर करण्यात आला होता.