अधिवेशनाच्या पहिल्याच दिवशी महागाईच्या मुद्द्यावर गदारोळ, कामकाज तहकूब

नवी दिल्ली : पावसाळी अधिवेशनात संसदेचे कामकाज सकारात्मक पद्धतीने व्हावे असे आवाहन पंतप्रधान नरेंद्र मोदींनी केले असले तरी पहिल्याच दिवशी महागाईच्या मुद्द्यावर कॉंग्रेस खासदारांच्या गदारोळामुळे लोकसभेचे कामकाज दिवसभरासाठी तहकूब करावे लागले. संसदेच्या पावसाळी अधिवेशनाला सुरवात होण्यापूर्वी आधी प्रथेप्रमाणे पंतप्रधान नरेंद्र मोदींनी माध्यमांशी संवाद साधून सर्व पक्षांना अधिवेशन काळात सहकार्याचे आवाहन केले. या अधिवेशनात होणाऱ्या राष्ट्रपती आणि उपराष्ट्रपतिपदाच्या निवडणुकीचा दाखला देत मोदी म्हणाले, की या कालखंडात देशाला नवे राष्ट्रपती आणि नवे उपराष्ट्रपती आणि त्यांचे मार्गदर्शन मिळणार आहे. संसद संवादाचे खुले सक्षम माध्यम आहे. वेळ आल्यास वादविवाद होतात. एखाद्या गोष्टीवर व्यापक चर्चा होऊन बारकाईने केले जाणाऱ्या विश्लेषणाचे धोरण ठरविताना आणि निर्णय करताना सकारात्मक योगदान ठरू शकते.

कामकाज सुरू झाल्यानंतर कॉंग्रेसचे गटनेते अधीर रंजन चौधरी यांनी महागाईचा मुद्दा उपस्थित करण्याचा प्रयत्न केला. मात्र, लोकसभाध्यक्ष ओम बिर्ला यांनी राष्ट्रपती निवडणुकीसाठी मतदान सुरू असल्याचे सांगत कामकाज सुमारे दीड तासासाठी तहकूब केले. दुपारी दोनला सभागृह पुन्हा सुरू होताच महागाईच्या मुद्द्यावरून कॉंग्रेसच्या खासदारांनी हौद्यात उतरून घोषणाबाजीला सुरवात केली. राष्ट्रवादी कॉग्रेसच्या खासदार सुप्रिया सुळे, अमोल कोल्हे यांनी या विरोधाला पाठिंबा व्यक्त केला. त्यात राजस्थानचे खासदार हनुमान बेनीवाल यांनी अग्निपथ योजनेच्या विरोधात निदर्शने केल्यामुळे गदारोळ झाला.

सिन्हा, लोधी यांनी घेतली शपथ

लोकसभेचे कामकाज सुरू होताच पोटनिवडणुकीमध्ये विजयी झालेल्या विविध राज्यांतील प्रतिनीधींना सदस्यत्वाची शपथ देण्यात आली. शत्रुघ्न सिन्हा (आसनसोल), दिनेश लाल यादव निरहुआ (आझमगड) आणि घनश्यामसिंह लोधी (रामपूर) यांनी शपथ घेतली. संगरूरमध्ये विजयी झालेले शिरोमणी अकाली दलाचे (अमृतसर) सिमरनजितसिंग मान यांनी ओम बिर्ला यांच्या कार्यालयात शपथ घेतली.