'तो मोदींविरुद्ध बोलला म्हणून ..'संसदेत अपशब्द काढल्यानंतर भाजप खासदाराचे सभापतींकडे स्पष्टीकरण

MP Abuse In Parliament:संसदेत चांद्रयान-३च्या विषयावर सुरु असलेल्या चर्चेदरम्यान भारतीय जनता पक्षाचे खासदार रमेश बिधुरी यांनी बहुजन समाज पार्टीचे खासदार दानिश अली यांच्याबद्दल अत्यंत खालच्या पातळीचे असभ्य शब्द वापरले होते. त्यानंतर या घटनेवर गंभीरतेने सभापतींनी चर्चा केली आणि रमेश बिधुरी यांनी केलेलं वक्यव्य संसदेच्या कामकाजातून हटवण्यात आलं.

या सर्व प्रकरणावर आता तिसऱ्या खासदाराने स्पष्टीकरण दिले आहे. भाजप खासदार रमेश बुधारी आणि खासदार दानिश अली यांच्यात नेमकं काय घडलं होतं, याची माहिती भाजप खासदार निशिकांत दुबे यांनी सभापती ओम बिर्ला यांना दिली आहे.

भाजप खासदार निशिकांत दुबे यांनी शनिवारी लोकसभा अध्यक्ष ओम बिर्ला यांना पत्र लिहून गुरुवारी लोकसभेत बसपा खासदार कुंवर दानिश अली आणि भाजप खासदार रमेश बिधुरी यांच्यात काय घडलं याची प्रत्येक बारीक गोष्ट सांगितली आहे. त्यांनी पत्र लिहितं ही माहिती दिली. दानिश अली यांनी पंतप्रधान मोदींबद्दल खालच्या पातळीतील शब्द वापरले जे माफीस पात्र नव्हते. आपल्या पत्रात निशिकांत दुबे म्हणाले की, रमेश बुधारी यांच्या गैरवर्तनाचे समर्थन करत नाही, पण त्यांनी हे पाऊल का उचललं याची पार्श्वभूमी सभापतींना माहिती हवी.

मागच्या काही दिवसांमध्ये या प्रकरणाकडे मीडियाने लक्ष वेधून घेतलं आहे आणि इतर राजकीय पक्ष त्याचं राजकारण टिकवण्यासाठी याला हवा देत आहे, असे दुबे म्हणाले.(Latest Marathi News)

निशिकांत दुबे म्हणाले की, "श्री दानिश अली यांनी केलेले हे विधान, माझ्या मते, कोणत्याही देशभक्त लोकप्रतिनिधीला 'शांतता गमावण्यासाठी' पुरेसे होते आणि त्यामुळे श्री बिधुरी यांनी त्यांना त्यांच्याप्रमाणेच प्रतिसाद दिला." . निशिकांत दुबे म्हणाले की, दानिश अलीने अशी मोदींविषयी 'लज्जास्पद आणि निंदनीय' टिप्पणी केली तेव्हा मीडियाचे लक्ष त्यांच्या वक्तव्यांकडं गेलं नाही. (Latest Marathi News)