ड्रग्ज माफियांना मोठा दणका; भारतीय नौदलानं पकडला ३,००० कोटींचा अंमली पदार्थांचा साठा

कोची : अंमलीपदार्थांसंदर्भात भारतीय नौदलानं मोठी कारवाई केली आहे. या कारवाईमुळे ड्रग्ज माफियांचं धाब दणाणलं आहे. सोमवारी अरबी समुद्रात पेट्रोलिंगदरम्यान एका मच्छिमार बोटीतून सुरु असलेली तब्बल ३००० कोटी रुपयांची अंमलीपदार्थांची मोठी तस्करी रोखण्यास नौदलला यश आलं. संबंधित बोटीसह यावर काम करणाऱ्या खलाशांना ताब्यात घेण्यात आलं असून त्यांना कोची येथे पुढील चौकशीसाठी नेण्यात आलं आहे. संबंधित बोट ही भारताची बोट नसल्याची माहिती सुत्रांनी दिल्याचं इंडियन एक्स्प्रेसनं आपल्या वृत्तात म्हटलं आहे. यामुळे ड्रग्ज तस्करीचा मोठा आंतरराष्ट्रीय व्यापार उद्ध्वस्त करण्यात आला आहे.

नौदलाच्या निवेदनानुसार, आयएनएस सुवर्णा हे नौदलाचं जहाज अरबी समुद्रात पेट्रोलिंगदरम्यान टेहळणी करत असताना यावरील अधिकाऱ्यांना समुद्रातील एका मच्छिमार बोटीवर संशयास्पद हालचाली दिसून आल्या. त्यानंतर नौदलानं ही बोट थांबवली आणि त्यावर प्रवेश करत शोध मोहिम राबवली. यावेळी नौदलाच्या अधिकाऱ्यांना तब्बल ३०० किलो अंमलीपदार्थ आढळून आले. इतक्या मोठ्या प्रमाणावरील अंमलीपदार्थांची आंतरराष्ट्रीय बाजारातील किंमत तब्बल ३,००० कोटी रुपये आहे.

नौदलानं पुढे म्हटलं की, मोठा साठा आणि मोठी किंमत याच्यापेक्षा बेकायदा अंमलीपदार्थांची तस्करीचा मार्ग रोखण्यात आला ही बाब मोठी आहे. हा तस्करीचा मार्ग मक्रान किनाऱ्यावरुन पुढे भारतीय, मालदीव आणि श्रीलंकेच्या हद्दीतून जातो. या कारवाईमुळे मानवी ड्रग्ज अॅडिक्शन, ड्रग्जचा व्यापार उद्ध्वस्त करण्यात यश आलं आहे. यामध्ये दहशतवाद, मूलतत्ववाद आणि गुन्हेगारी प्रवृत्तींचा समावेश असतो.