बिहारमध्ये ‘एनडीए’ २२० जागा जिंकेल; मुख्यमंत्री नितीशकुमार यांना विश्‍वास

पाटणा : आगामी वर्षांत बिहार विधानसभा निवडणुकीत राष्ट्रीय लोकशाही आघाडी (एनडीए) २२० जागा जिंकेल, असा विश्‍वास बिहारचे मुख्यमंत्री नितीशकुमार यांनी व्यक्त केला. बिहारच्या विकासाची चक्रे वेगाने फिरविण्यासाठी राज्यातील लोक ‘एनडीए’लस पुन्हा सत्ता देऊ इच्छित आहेत, असेही नितीशकुमार म्हणाले. ते आज संयुक्त जनता दलाच्या कार्यकारिणीत बोलत होते.

नितीशकुमार म्हणाले, २००५ च्या अगोदर बिहारची दुरवस्था सर्वांनाच ठाऊक आहे. कायदा आणि सुव्यवस्थेपासून ते शिक्षण, आरोग्य व्यवस्था सगळ्याच क्षेत्रात गोंधळ होता. सर्वत्र बोजवारा उडालेला होता. यावेळी भाषणात त्यांनी प्रशांत किशोर यांचे नाव न घेता टीका केली.

गांधी जयंतीच्या दिवशी काहींनी मद्यबंदी मागे घेण्याची मागणी करणे चुकीचे आहे, असे नितीशकुमार म्हणाले. येत्या वर्षात बिहारमध्ये दहा लाख तरुणांना रोजगार दिला जाईल. पुढच्या वर्षी बिहार विधानसभेची निवडणूक होणार आहे.

आपण किमान २२० जागा जिंकू याचा मला ठाम विश्‍वास आहे. अटलबिहारी वाजपेयी यांच्या मंत्रिमंडळात मंत्री म्हणून काम करण्याची संधी मिळाली होती. मी बिहारचा मुख्यमंत्री व्हावे, असे अटलबिहारी वाजपेयी यांना वाटत होते.

त्याप्रमाणे २००५ मध्ये एनडीएत सेवा करण्याची संधी मिळाली. प्रत्येक क्षेत्रात आम्ही चांगले काम केले. लोकांना देखील त्याचा अनुभव येत आहे. राज्यात रस्ते आणि पुलांचे जाळे उभारले आहे. शाळांची डागडुजी केली आणि स्थितीत सुधारणा केली.

राज्यातील कायदा आणि सुव्यवस्था चांगली केली आणि सरकारी रुग्णालयात उपचार घेणाऱ्यांची संख्या देखील वाढली आहे. मुलींना शाळेत आणि महाविद्यालयात जाण्यासाठी प्रोत्साहित केले. पंतप्रधान नरेंद्र मोदी, गृहमंत्री अमित शहा यांनी बिहारच्या विकासासाठी नेहमीच मदत केली आहे.

‘जेडीयू’च्या नेत्यांनी एनडीए सरकारने केलेल्या कामांची माहिती जनतेपर्यंत पोचवावी, असे आवाहन नितीशकुमार यांनी केले. सध्या मोबाईलचा जमाना आहे आणि पूर्वीच्या सरकारमध्ये बिहारमध्ये काय होत होते आणि आता काय विकासकामे होत आहे, ते तुम्ही जनतेला सांगा, असेही नितीशकुमार या वेळी म्हणाले.