योगाभ्यासाचं मूळ नेपाळमध्ये भारतात नव्हे; पंतप्रधान ओलींचा दावा

काठमांडू : जगभरात आज सर्वत्र आंतरराष्ट्रीय योग दिवस (Internation Yoga Day) साजरा केला जात आहे. या पार्श्वभूमीवर नेपाळचे पंतप्रधान केपी शर्मा ओली यांच्या एका दाव्यामुळं वाद निर्माण होण्याची चिन्हे आहेत. योगाभ्यासाचं मूळ हे भारतातील नसून नेपाळमधील आहे, असा दावा त्यांनी केला आहे. नेपाळमध्ये आंतरराष्ट्रीय योग दिनानिमित्त आयोजित कार्यक्रमात ते बोलत होते. (KP Sharma Oli claims yoga originated in Nepal)

ओली यांनी म्हटलं की, "देश म्हणून भारत अस्तित्वात येण्यापूर्वीच नेपाळमध्ये योगाभ्यास केला जात होता. त्यामुळे याचं मूळ हे भारतात नसून नेपाळमध्ये आहे. सध्या भारतात असलेल्या उत्तराखंडच्या भागात या योगाभ्यासाचा उदय झाला होता. आम्ही कधीही आमच्या ऋषींना याचं श्रेय दिलं नाही ज्यांनी योगाभ्यासाचा शोध लावला. आम्ही कायम या विषयावर आणि त्यांच्या योगदानावर चर्चा करत राहिलो कधीही योगाभ्यासावर योग्य प्रकारे दावा करु शकलो नाही. आम्ही याला कधीही जगभरात पोहोचवू शकलो नाही. पण पंतप्रधान नरेंद्र मोदी यांनी योगाभ्यासाला जगात मान्यता मिळवून दिली. त्यामुळे आता आंतरराष्ट्रीय योग दिवस म्हणून तो साजला केला जात आहे.

यापूर्वी ओली यांनी दावा केला होता की प्रभू रामाचा जन्म नेपाळमध्ये झाला होता. याच दाव्याचा आजच्या कार्यक्रमात त्यांनी पुनरुच्चार केला. रामाच्या जन्मस्थळाचा दावा करताना ओलींनी म्हटलं होतं की, प्रभू रामाचा जन्म नेपाळमधील चितवन जिल्ह्यातील अयोध्यापुरीत झाला होता. भारतातील अयोध्येत नव्हे. त्याचबरोबर त्यांनी नेपाळमध्ये राम, लक्ष्मण आणि सीतेचं भव्य मंदिर बांधण्याचे आदेशही दिले होते. अयोध्यापुरी नेपाळमध्ये होती, वाल्मिकी ऋषी देखील याच जिल्ह्यातील होते. सीतेचा मृत्यूही नेपाळमधील देवघाट येथे झाला होता असा दावाही त्यांनी केला होता. हे देवघाट अयोध्यापुरी आणि वाल्मिकी आश्रमाजवळ आहे.

ओली पुढे असेही म्हणाले की, "आयुर्वेदाचा अभ्यास आणि शोध लावणाऱ्या अनेक ऋषींचा जन्म हा नेपाळमध्ये झाला होता. बनारसमधून हिमालयातील औषधी वनस्पतींचा अभ्यास करता येत नाही. अनेक आयुर्वेदिक औषधींवर नेपाळमध्ये संशोधन केलं गेलं त्यानंतर ते वाराणसीला नेलं."