'नव्या मंत्रिमंडळातील मंत्र्यांच्या निवडीत हस्तक्षेप करणार नाही'

बंगळूर : माजी मुख्यमंत्री बी. एस. येडियुराप्पा (B.S. yediyurappa) यांनी शुक्रवारी नव्या मंत्रिमंडळातील मंत्र्यांच्या निवडीत आपण हस्तक्षेप करणार नसल्याचा पुनरुच्चार केला. आपण पक्षाला बळकट करण्यासाठी काम करत राहणार असल्याचे सांगून नवीन मुख्यमंत्री बसवराज (CM basavaraj bommai) बोम्मई पक्ष नेतृत्वाशी सल्लामसलत करून आपली टीम निवडण्यास मोकळे असल्याचे त्यांनी सांगितले.

आत्महत्या केलेल्या आपल्या चाहत्याच्या कुटुंबाचे सांत्वन करण्यासाठी त्यांनी चामराजनगर जिल्ह्याला भेट दिली. त्यांच्या कुटुंबीयांना पाच लाख रुपयांची मदत दिली. त्यानंतर पत्रकारांशी बोलताना ते म्हणाले, बोम्मई आज दिल्लीत आहेत, ते केंद्रीय नेत्यांशी चर्चा करतील आणि त्यांच्या मंत्रिमंडळात कोण असावे, यावर निर्णय घेतील. कोणाला मंत्री करावे किंवा नाही यावर मी हस्तक्षेप करणार नाही. पक्षांतर केलेल्या आमदारांना मंत्रिमंडळात सामील करण्याच्या प्रश्नावर ते म्हणाले, यावर निर्णय घेण्यास बोम्मई मुक्त आहेत, ते पक्ष नेतृत्वाशी चर्चा करून निर्णय घेतील.

येत्या काही दिवसांत पक्षाला बळकटी देण्यासाठी मी राज्यभर प्रवास करणार आहे. पंतप्रधान मोदी, अमित शहा आणि पक्षाचे अध्यक्ष जे. पी. नड्डा यांना मी तसे आश्वासन दिले आहे. गणेश चतुर्थीनंतर प्रत्येक आठवड्यात एखाद्या जिल्ह्याचा दौरा करून संघटना बळकट करण्यासाठी कार्यकारिणीच्या बैठका घेणार आहे.

चाहत्याने केलेल्या आत्महत्येवर बोलताना ते म्हणाले, त्याने केलेल्या आत्महत्येने मला दु:ख झाले आहे, असे होऊ नये. त्यांची आई व दोन बहिणी आहेत. त्यांचे लग्न झालेले नाही, कुटुंबाची काळजी घेणे ही माझी नैतिक जबाबदारी आहे. म्हणून मी त्याच्या आईला पाच लाख रुपये दिले आहेत. त्यांच्या बँक खात्यात आणखी पाच लाख रुपये जमा करण्यात येतील व त्यातून त्यांना व्याज मिळेल. त्यांच्यासाठी आणखी काय करता येते ते पाहू.

लोकांचे प्रेम व आपुलकी

जिल्ह्यात आल्यावर लोकांनी केलेल्या स्वागताचा उल्लेख करून माजी मुख्यमंत्री म्हणाले, सत्तेत नसतानाही लोकांच्या प्रेम आणि आपुलकीचे हे उत्तम उदाहरण आहे. माझ्या राजीनाम्याबद्दल पक्षाचे अनेक कार्यकर्ते नाराज आहेत. सत्ता कायम नसते, मी इतरांना मार्ग मोकळा करण्यासाठी राजीनामा दिला आहे. बसवराज बोम्मई राज्यात चांगले काम करतील, असा विश्वास असल्याचे ते म्हणाले.