वाहनधारकांनो! लायसन, नोंदणी कागदपत्रांबाबत केंद्राचा महत्त्वाचा निर्णय

नवी दिल्ली - वाहन चालकांना दिलासा देणारा निर्णय केंद्र सरकारने घेतला आहे. आता गाडी चालवण्याचा परवाना, वाहन नोंदणी प्रमाणपत्र, तंदुरुस्ती प्रमाणपत्र किंवा इतर आवश्यक कागदपत्रांच्या रिन्यूसाठी मुदत वाढवण्यात आली आहे. ही मुदत 30 सप्टेंबर 2021 पर्यंत वाढवली असल्याचं वृत्त हिंदुस्तान टाइम्सने दिलं आहे. फेब्रुवारी 2020 नंतर मुदत संपलेली कागदपत्रे ज्यांना कोरोनामुळे रिन्यू करता आलेली नाहीत त्यांच्यासाठी हा निर्णय घेण्यात आला आहे. केंद्रीय रस्ते वाहतूक आणि महामार्ग मंत्रालयाने हा निर्णय घेतला असून याबाबतचे आदेश प्रादेशिक परिवहन कार्यालायांना आदेश देण्यात आले आहेत.

केंद्राकडून देण्यात आलेल्या माहितीनुसार, 1 फेब्रुवारी 2020 नंतर आणि 30 सप्टेंबर 2021 पर्यंत मुदत संपणाऱ्या कागदपत्रांचीच मुदत वाढवण्यात आली आहे. त्याआधीच्या कागदपत्रांसाठी हा नियम लागू नाही. सर्व राज्ये आणि केंद्र शासित प्रदेशांना सांगण्यात आलं आहे की, कोरोनामुळे अनेक ठिकाणी लॉकडाऊन करण्यात आले. त्यानंतर कागदपत्रे रिन्यू करता आलेली नाहीत अशा लोकांना अडचणी येऊ नयेत. त्यामुळे अशा कागदपत्रांसाठी कोणाला त्रास होऊ नये याची काळजी घ्या.

केंद्र सरकारने फिटनेस प्रमाणपत्र, परवाने, लायसन्स, नोंदणीच्या कागदपत्रांची मुदत वाढवली आहे. मोटर व्हेईकल अॅक्ट 1988 आणि सेंट्रल मोटर व्हेइकल रूल 1989 अंतर्गत येणाऱ्या कागदपत्रांची मुदतसुद्धा 30 सप्टेंबरपर्यंत वाढवली असल्याचं एका अधिकाऱ्याने नाव न सांगण्याच्या अटीवर सांगितले. कागदपत्रे नसल्यास पाच हजार रुपयांचा आणि परवाना नसेल तर दहा हजार रुपयांचा दंड भरावा लागतो. पोल्युशन अंडर कंट्रोल (पीयूसी) च्या सर्टीफिकेटसाठी मात्र मुदत वाढ लागू नाही.