जाणून घ्या: दिल्लीत सापडलेल्या पहिल्या ओमिक्रॉन रुग्णाची लक्षणे

ओमिक्राॅन संसर्गाचे (Omicron Variant)जगभरात रूग्ण वाढत असतानाच भारतात देखील ओमिक्रॉनचे आतापर्यंत पाच रुग्ण सापडले आहेत. कर्नाटक, महाराष्ट्र आणि दिल्लीत (Karnataka,Maharashtra,Delhi) हे रूग्ण सापडले आहेत. प्रशासन यंत्रणा सतर्क झाली असून, घाबरून न जाता काळजी घेण्याचे आवाहन प्रशासनाने केले आहे. यापैकी राजधानी दिल्लीत सापडलेला रूग्ण हा आफ्रिकन देशातील टांझानियामधून आलेला होता. त्याच्यावर दिल्लीतील एलएनजेपी रुग्णालयात उपचार सुरू आहेत. या रुग्णास सुरवातीला ताप होता. याशिवाय त्याचा घसाही दुखत होता. अशी माहिती एलएनजेपीचे वैद्यकीय संचालक डॉ सुरेश कुमार (D.Suresh Kumar) यांनी दिली. नेमकी कोणती लक्षणे होती जाणून घेऊया.

ओमिक्रॉनची लागण झालेल्या रुग्णाने कोरोना लसीचे दोन्ही डोस घेतले होते. या रुग्णाचा पहिल्यांदा घसा दुखू लागला. त्यानंतर त्याला थकवा जाणवू लागला. मात्र त्याची ऑक्सिजन पातळी कमी झालेली नसून त्याची तब्येत उत्तम आहे. ओमिक्रॉन टाळण्यासाठी लसीचे दोन्ही डोस देणे आवश्यक आहे. डोस पुर्ण असणाऱ्या व्यक्तीमध्ये ओमिक्रॉन असेल तर त्याला 'आयसीयू' ची गरज भासत नाही.

डॉ. सुरेश कुमार म्हणाले की, डॉक्टरांची टीम २४ तास रुग्णावर लक्ष ठेवून आहे. ऑक्सिजनच्या पातळीची विशेष काळजी घेतली जात आहे. त्यासाठी पूर्ण तयारी करण्यात आलेली आहे. रूग्णाच्या शरीरातील होणाऱ्या बदलाकडे डॉक्टरांचे बारीक लक्ष आहे.

आपत्कालीन परिस्थितीसाठी रुग्णालय सज्ज

रुग्णालयातील रुग्णांची संख्या वाढल्यास या आपत्कालीन परिस्थितीसाठी सज्ज असल्याचीही माहिती देण्यात आली आहे. जीनोम सिक्वेंसिंग रिपोर्ट येण्यास वेळ लागतो. यासाठी ४ ते ५ दिवस लागतात. त्यामुळे परदेशातून येणाऱ्या लोकांपासून सुरक्षित अंतर ठेवण्यास हि सांगणयात आले आहे.