सिद्धूच्या राजीनाम्यावर कॅप्टन अमरिंदर सिंग यांची पहिली प्रतिक्रिया

नवी दिल्ली: पंजाबमध्ये काँग्रेसला (Punjab congress) मोठा धक्का बसला आहे. नवज्योत सिंग सिद्धू (navjot singh sidhu) यांनी तडकाफडकी काँग्रेसच्या प्रदेशाध्यक्ष पदाचा राजीनामा दिला आहे. मागच्या काही दिवसांपासून पंजाबमध्ये जोरदार राजकीय घडामोडी पहायला मिळत आहेत. सिद्धू यांनी कॅप्टन अमरिंदर सिंग (captain amrinder singh) यांच्याविरोधात राजकीय आघाडी उघडली होती. अखेर काँग्रेसने सिद्धू यांची प्रदेशाध्यक्षपदी नियुक्ती केली. त्यानंतर काँग्रेसने या राज्यात नेतृत्वबदल करण्याचा मोठा निर्णय घेतला. भाजपाशासित (bjp) राज्यांप्रमाणे पंजाबमध्ये सहजतेने नेतृत्वबदल झाला नाही.

मुख्यमंत्रीपदी चरणजीतसिंग चन्नी यांचं नाव निश्चित होण्याआधी बऱ्याच घडामोडी घडल्या. त्यातून पक्षांतर्गत मतभेद समोर आले. काँग्रेसने कॅप्टन अमरिंदर सिंग यांना राजीनामा द्यायला सांगणे ही मोठी गोष्ट होती. चन्नी यांची मुख्यमंत्रीनिवड झाल्यानंतर आता सर्वकाही सुरळीत होईल, असे वाटत असतानाच सिद्धू यांनी अचानक प्रदेशाध्यक्षपदाचा राजीनामा दिला आहे. त्यामुळे येणाऱ्या दिवसात काँग्रेसमधल्या अंतर्गत कुरघोड्यांची चर्चा रंगणार आहे तसेच विधानसभा निवडणुका तोंडावर असलेल्या पंजाबमध्ये काँग्रेसला याचा फटकाही बसू शकतो.

सिद्धू यांच्या राजीनाम्यावर माजी मुख्यमंत्री कॅप्टन अमरिंदर सिंग यांनी प्रतिक्रिया दिली आहे. "मी तुम्हाला म्हणालो होतो...तो स्थिर माणूस नाहीय. पंजाब सारख्या सीमावर्ती राज्यासाठी ह योग्य माणसू नाही" असं कॅप्टन अमरिंदर सिंग यांनी टि्वट केलं आहे. अमरिंदर सिंग भाजपामध्ये प्रवेश करतील अशी चर्चा सुरु असतानाच सिद्धू यांनी प्रदेशाध्यक्षपदाचा राजीनामा दिला आहे.

सिद्धूने राजीनामापत्रात काय म्हटलं आहे...

माणसाचे चारित्र्य कोसळण्याची सुरुवात ही तडजोड करण्यापासून सुरु होते. मी पंजाबच्या भविष्या आणि कल्याणाबाबत तडजोड करु शकत नाही. त्यामुळेच मी पंजाब प्रदेश काँग्रेस कमिटीच्या अध्यक्षपदावरुन राजीनामा देतो आहे. मी काँग्रेसची सेवा करत राहीन.