Breaking : संसदेच्या सुरक्षेत मोठी चूक! अज्ञात दोघांचा सुरक्षा भेदून सभागृहात प्रवेश; पाहा व्हिडीओ

संसदेचे हिवाळी अधिवेशनादरम्यान कामकाज सुरू असतानाच संसदेच्या सुरक्षेत मोठी चूक झाल्याचा प्रकार समोर आला आहे. लोकसभा सभागृहात कामकाजादरम्यान दोन अज्ञात व्यक्ती घुसल्याच्या प्रकार घडल्याने खळबळ उडाली आहे. या प्रकारानंतर लोकसभेचं कामकाज स्थगित करण्यात आलं आहे.

मिळालेल्या माहितीनुसार, दोन तरुणांनी सभागृहाच्या प्रेक्षक गॅलरीतून टिअर गॅस कॅन घेऊन खासदार बसतात तेथे उड्या मारल्या. कामकाजादरम्यान घुसखोरी केलेल्या दोघांपैकी एकाचे नाव सागर असल्याचे सांगण्यात येत आहे. दोघेही खासदाराच्या नावाने असलेल्या लोकसभा व्हिजीटर पासवर संसदेत आले होते. खासदार दानिश अली यांनी सांगितले की, हे दोघे म्हैसूर येथील भाजप खासदार प्रताप सिम्हा यांच्या नवावर लोकसभा व्हिजीटर पास घेऊन आले होते.

काँग्रेसचे नेते अधीर रंजन चौधरी यांनी सांगितले की, दोन तरूणांनी प्रेक्षक गॅलरीतून सभागृहात उड्या मारल्या. त्यांनी काहीतरी फेकलं, ज्यामधून गॅस बाहेर येत होता. त्यांना खासदारांनी पकडलं आणि सुरक्षा रक्षकांनी त्यांना बाहेर काढलं. यानंतर सभागृहाचं कामकाज दोन वाजेपर्यंत स्थगित करण्यात आलं आहे. हे निश्चितपणे सुरक्षेचे उल्लंघन आहे कारण आज आपण 2001 मध्ये ज्यांनी बलिदान दिले त्यांची पुण्यतिथी साजरी करत आहोत.  

नेमकं काय झालं?

खासदारांनी दिलेल्या माहितीनुसार, लोकसभेत शुन्य प्रहरादरम्यान भाजप खासदार खरगेन मुर्मू बोलत होते, तेव्हा एका व्यक्तीने प्रेक्षक गॅलरीमधून उडी मारली. यानंतर दुसऱ्या व्यक्तीने देखील त्याच्या मागोमाग सभागृहात उडी मारली. यानंतर संसद सभागृहात खळबळ उडाली. काही खासदारांनी दोन तरुणांना पकडलं, यानंतर संसदेच्या सुरक्षारक्षकांनी दोघांना ताब्यात घेतले. त्यांना संसद मार्ग पोलिस स्टेशनमध्ये घेऊन जाण्यात आले. दिल्ली पोलिसांच्या अँटी टेरर युनिटच्या स्पेशल सेल कडून या घुसखोरी करणाऱ्यांची चौकशी केली जात आहे.